Հասարակություն

Առողջ ապրելակերպը՝ առողջ սիրտ ունենալու գրավական

aidaavetisyan
Սեպտեմբերի 29-ը ԱՀԿ  և Սրտի  համաշխարհային  ֆեդերացիան  հռչակել են  որպես սրտի համաշխարհային օր: Այս տարվա  կարգախոսն է «Առողջ սրտի համար առողջ ընտրություն միշտ և ամենուր»: Առողջապահության համաշխարհային կազմակերպության տվյալների համաձայն՝ աշխարհում առավել տարածված ոչ վարակիչ հիվանդություններից մահանում է մոտ 38 միլիոն մարդ, որից 48 տոկոսը կազմում են  արյան շրջանառության համակարգի հիվանդությունները: Հայաստանում արյան շրջանառության համակարգի հիվանդություններից  տարածվածներն են զարկերակային  բարձր ճնշմամբ և   սրտի սնուցման խանգարման հետ կապված  հիվանդությունները՝ ստենոկարդիան  և սրտամկանի սուր ինֆարկտն ու ուղեղի արյան շրջանառության սուր խանգարումը՝ ինսուլտը:

Առողջ սիրտ ունենալու առաջին գրավականը առողջ ապրելակերպն է: Չծխել, չչարաշահել ալկոհոլը,  զբաղվել սպորտով,  հետևել սննդակարգին. միայն այս  դեպքում  հնարավոր կլինի նվազեցնել  սրտի գանգատներով բժշկի դիմելիությունը, պնդում են  մասնագետները: Առողջապահության համաշխարհային կազմակերպության տվյալներով՝   առավել տարածված ոչ վարակիչ հիվանդություններից աշխարհում տարեկան մահանում է 38 միլիոն  մարդ, որից 48 տոկոսը  կազմում են  արյան շրջանառության համակարգի հիվանդությունները, որն էլ,  ի դեպ,  երիտասարդացման միտում ունի:

Հայաստանում  արյան շրջանառության համակարգի հիվանդություններից  տարածված են  զարկերակային բարձր  ճնշմամբ պայմանավորված հիվանդությունները, տարածվածությամբ երկրորդ, սակայն մահացության ցուցանիշներով  առաջին տեղն են  զբաղեցնում  ստենոկարդիան,  սրտամկանի սուր ինֆարկտը և ուղեղի արյան շրջանառության սուր խանգարումը՝ ինսուլտը: Միայն 2014 թվականին արձանագրվել է սրտի իշեմիկ հիվանդության մոտ  17,000 նոր դեպք, որից 2080-ը սրտամկանի սուր ինֆարկտն է:  Ամբողջ աշխարհում տարածված  և մահացության ցուցանիշներով առաջին տեղը զբաղեցնող սրտանոթային  հիվանդությունների  նվազեցման ուղղությամբ  ՀՀ առողջապահության նախարարությունն իրականացնում է  համալիր ծրագրեր: 2015 թվականից սկսվել է  «Հիվանդությունների կանխարգելում և վերահսկում» սկրինինգային ծրագիրը , որի նպատակն է  35-ից 68 տարեկան անձանց շրջանում  հայտնաբերել զարկերակային գերճնշում:

«Արդեն իսկ  170,000 մարդ զարկերակային գերճնշման սկրինինգային  հետազոտություն է անցել, որի արդյունքում մոտ 11 տոկոսի մոտ հայտնաբերվել է  գերճնշում և համապատասխան շարունակական բուժման պլան է նրանց  համար նախատեսվել»:

Ծրագրերից մեկն էլ վերաբերում է  սոցփաթեթի շահառուներին, ովքեր կանխարգելիչ  բուժզննություն պետք է անցնեն ոչ վարակիչ հիվանդությունների վաղ հայտնաբերման և , վերահսկման, ինչպես նաև վաղաժամ մահացությունների թիվը նվազեցնելու համար

ԱՆ բժշկական օգնության քաղաքականության բաժնի պետ Ծաղիկ Վարդանյանի խոսքով՝  այս տարի իրագործվող ծրագրերից  սրտի անհետաձգելի  վիրահատության շրջանակներում բժշկական օգնություն է ստացել 1068 քաղաքացի: Արդեն իսկ պետական պատվերի շրջանակներում կատարվել է  2308 սրտի վիրահատություն, որից 1426-ը փոխհատուցվել է  ամբողջությամբ, իսկ 882-ը՝ մասնակի: Նրանց մեջ են մտնում նաև սոցփաթեթի շահառուները:

Հաճախ ենք լսում, որ պետպատվերի շրջանակներում իրականացվող վիրահատությունների համար անհրաժեշտ է նախապես գրանցվել: Սակայն ԱՆ ներկայացուցիչը նշեց, որ  անհետաձգելի վիրահատությունների համար հերթագրում ասվածը չի գործում: Հերթագրումն իրականացվում է  խրոնիկ հիվանդությունների պարագայում և այն վերահսկվում  է  կառավարության համապատասխան որոշմամբ: Խոսելով մանկական սրտաբանությունից՝ ԱՆ բժշկական օգնության քաղաքականության բաժնի պետը նշեց, որ Հայաստանում մեկ կլինիկայում են մատուցվում մանկական սրտաբանության ծառայություններ,  տարեկան 500-ից 600 մանկական սրտեր են պետպատվերի շրջանակներում վիրահատվում: Սակայն ԱՆ ներկայացուցիչը հույս հայտնեց, որ գերատեսչության ծրագրերում է ունենալ մանկական սրտային վիրաբուժության բաժանմունք և ընդլայնել կլինիկաների թիվը:

Back to top button