Վերլուծական

Թուրքիայում չեն բացառվում կտրուկ փոփոխություններ

annanazaryan

Թուրքիայում տեղի ունեցող ներքաղաքական լարվածությունն ու արտաքին քաղաքական զարգացումները վերլուծելով` թուրքագետ, ԳԱԱ արևելագիտության ինստիտուտի տնօրեն Ռուբեն Սաֆրաստյանը հավանական է համարել նոյեմբերին նախատեսված խորհրդարանական ընտրություններից առաջ կտրուկ փոփոխություններ հարեւան երկրում։

 

 

r. safrastyanԱյսօր Թուրքիայում տեղի է ունենում այն, ինչի մասին հնարավոր չէր նախկինում պատկերացնել: Էրդողանի ռեյտինգը երկու անգամ իջել է, ինչը նշանակում է, որ նոյեմբերին նախատեսված խորհրդարանական ընտրությունների արդյունքում Էրեդողանի «Արդարություն և զարգացում»  կուսակցությունը  չի կարողանա մեծամասմնություն կազմել ապագա խորհրդարանում։ Նման պայմաններում խարիզմատիկ Էրդողանը մինչեւ ընտրություններ լսել կտա աշխարհին որոշակի իրադարձությունների մասին, կամ փոխված խորհրդարանի ձևավորման ականատես կլինենք, ասում է թուրքագետ Ռուբեն Սաֆրաստյանը։

Արտաքին քաղաքական հարթությունում ևս Անկարայի դիրքերը ամուր չեն: Ռուսական զորքերի տեղակայումը Սիրիայում փոխում է աշխարհաքաղաքական իրադրությունը: Ռուսաստանը վերադառնում է Մերձավոր Արևելք, իսկ դա նշանակում է, որ ի չիք է դառնում Թուրքիայի բաղձալի երազանքը, այն է՝ թուլացնել Ասադի դիրքերը։

Փոփոխությունները հետագայում ավելի մեծ գլխացավանք կդառնան Թուրքիայի համար, կարծում է թուրքագետը: ՉԻ բացառվում, որ ավելի ու ավելի սրվի  ներքաղաքական իրադրությունը, որի ընթացքում էլ սովորաբար  թիրախում հայտնվում են քրիստոնյաները ու հատկապես հայերը:

Վերջին օրերին հայ-ադրբեջանական սահմանագոտում նկատվող լարվածությունը, Ռուբեն Սաֆրաստյանի կարծիքով, Թուրքիայի հետ կապ չունի: Դա Ադրբեջանի սխալ հաշվարկների հետևանք է: Նյույորքյան հանդիպումներից առաջ՝ Բաքուն փորձում էր այդ կերպ ազդել ԼՂՀ խնդրի կարգավորման գործընթացի վրա: Իհարկե՝ դա չի նշանակում, թե Անկարան հավանություն չի տվել այդ գործողություններին։

Թուրքիայի կողմից սադրիչ գործողություններ, սակայն, Հայաստանի ուղղությամբ այսօր չեն սպասվում, քանի  որ, ըստ Սաֆրաստյանի, ուշադրությունն այժմ սեւեռված է Սիրիայի վրա։

Back to top button