Հասարակություն

Աղբանոցի վերածված պուրակը մաքրվել է

alisagevorgyan
Սեպտեմբերի 26-ին «Հայաստան — ծառատունկ» ծրագիրը կազմակերպել էր մաքրության աշխատանքներ Ապարանին հարակից Միրաք գյուղի սոչիների պուրակում, որը վերածվել էր ամենաիսկական աղբանոցի: Անտառի տարածքից մի քանի ժամվա ընթացքում դպրոցականների հավաքած պոլիէթիլենային տոպրակների ու պլաստմասե շշերի հսկայական կույտն ավելի ուշ վերածվել է արվեստի գործի:

 

 

1994 թվականին ամերիկահայ Քերոլին Մուգարի նախաձեռնությամբ Հայաստանում  ստեղծվեց «Հայաստան- ծառատունկ» ծրագիրը, որի նպատակն էր վերականգնել անտառային այն շերտը, որը ոչնչացվել էր սոցիալական և էներգետիկ ճգնաժամի ծանր շրջանում: 21 տարիների ընթացքում Հայաստանում և Արցախում կազմակերպությունը տնկել է 5 միլիոն ծառ: «Այժմ մեծ ուշադրություն ենք դարձնում մասնավորապես բնապահպանական  ուսուցմանը, որպեսզի երեխան դեռ  փոքրուց սովորի սիրել բնությունն ու հոգ տանի նրա  նկատմամբ» ,-ասում է ծրագրի երևանյան գրասենյակի տնօրեն Լուսինե Քասարջյանը:

Բնապահպանական ծրագրի շրջանակներում սեպտեմբերի 26-ին «Հայաստան ծառատունկ» ծրագիրը կազմակերպել էր մաքրության աշխատանքներ Ապարանին հարակից Միրաք գյուղի սոչիների պուրակում, որը վերածվել էր ամենաիսկական աղբանոցի: Անտառի տարածքից մի քանի ժամվա ընթացքում դպրոցականների հավաքած պոլիէթիլենային տոպրակների ու պլաստմասե շշերի հսկայական կույտը նկարիչ-մուլտիպլիկատոր Նառա Մուրադյանը փորձեց վերածել արվեստի ստեղծագործության, որը մեր հայրենակիցներին գուցեև կհուշեր, որ բնության հանդեպ նման դաժանությունն ու անտարբերությունը պարզապես անթույլատրելի են:

Աղբանոցի վերածված պուրակի վիճակը զայրացրել էր անգամ երեխաներին, որոնք այս դեպքում իրենք էին ստիպված հորդորել ոչ միայն տարեկիցներին, այլ մեծահասակներին:

 

Իր աշակերտների հետ պուրակի մաքրման աշխատանքներին ակտիվորեն մասնակցող Երևանի թիվ 130 դպրոցի ուսուցչուհի Կարինե Մանուկյանը պատմեց, որ ուսանողական տարիներին անձամբ մասնակցել է նույն պուրակի ստեղծմանը, որի տեսքն այսօր խիստ հակասական զգացողություններ  է առաջացնում:

Տարածքում ոչ աղբաման կար, ոչ էլ աղբահանության հետք, մինչդեռ  տարածաշրջանի գլխավոր  անտառապետ Գնել Ադամյանն ասաց, որ ամեն շաբաթ պուրակում մաքրության աշխատանքներ են իրականացվում: Ստեղծված վիճակի միակ պատասխանատուն, ըստ նրա, պուրակ այցելող քաղաքացիներն են:

«Ինչու է Միրաք գյուղի սոճիների պուրակը հայտնվել նման ծանր վիճակում», հարցով դիմեցի նաև Արագածոտնի մարզի ավագ անտառապետ Անդրանիկ Ղազարյանին: Նրա պարզաբանմամբ՝ մեկ անտառապետն ի վիճակի չէ վազել հսկայական պուրակի ամբողջ տարածով ու մաքրել յուրաքանչյուրի հետևից թափված աղբը:

Անդրադառնալով «Հայաստան –ծառատունկ» ծրագրի այլ անխաձեռնություններին, նշենք, որ ամենայն հավանականությամբ Շիրակի մարզում  կազմակերպությունն առաջիկայում  կհիմնի «Ապագայի անտառը»: Երկու հարևան  հատվածներում կտնկվեն ծառեր Հայաստանում ծնված աղջիկների և տղաների  թվաքանակով: «Ընդամենը երկու տարվա ընթացքում պուրակը կներկայացնի սեռով պայմանավորված աբորտների հետևանքով մեր երկրում ստեղծված  մտահոգիչ  պատկերը»,-ասում է ծրագրի երևանյան գրասենյակի տնօրեն Լուսինե Քասարջյանը:

after before tcar10 tcar9 tcar 4 tcar tcar1 tcar2 tcar3 tcar5 tcar6 tcar7 tcar8

Back to top button