Մշակույթ

Պերսեպոլիսի եւ Էրեբունու զուգադրությունը՝ Եվրոպական ժառանգության օրերում

aidaavetisyan

Ամեն տարի սեպտեմբերին Եվրոպական մշակութային կոնվեցիային միացած 50-ից ավելի եվրոպական երկրներում անցկացվում են «Եվրոպական ժառանգության  օրեր», որի ընթացքում էլ հնարավորություն է ընձեռվում  ճանաչել և ուսումնասիրել պատմամշակութային և բնության հուշարձանները, մասնավորապես նրանք, որոնք սովորաբար այցելելի չեն:  Հայաստանը ծրագրին առաջին անգամ միացել է  2000 թվականին ՀՀ արտաքին գործերի նախարարության համակարգմամբ, սակայն փոքր դադարից հետո  2004 թվականից այն իրականացվում է ՀՀ մշակույթի նախարարության նախաձեռնությամբ: «Եվրոպական ժառանգության օրեր» ծրագրին միացել են Հայաստանի և Լեռնային Ղարաբաղի հանրապետությունների  բազմաթիվ մշակութային օջախներ և պատմաճարտարապետական հուշարձաններ: « Եվրոպական ժառանգության օրեր» ծրագիրն այս տարի անցկացվելու է «Հիշատակի ժառանգությունը» խորագրի ներքո՝ նվիրված Հայոց ցեղասպանության 100-րդ տարելիցին:

 

Հայաստանի և Լեռնային Ղարաբաղի հանրապետությունների ավելի քան 90  մշակութային օջախներ «Եվրոպական  ժառանգության օրեր»  միջոցառման  շրջանակներում իրենց բազմաբովանդակ ծրագրերը կներկայացնեն տեղացի և օտարերկրացի հյուրերին: Ծրագիրը հասարակությանը՝ մասնավորապես երիտասարդներին, հաղորդակից է դարձնում սեփական մշակութային ժառանգությանը՝ շեշտելով  վերջիններիս դերակատարությունը և ակտիվ մասնակցությունը ժառանգության պահպանության գործում:

«Էրեբունի» պատմահնագիտական արգելոց- թանգարանը, որտեղ էլ տրվեց միջոցառումների մեկնարկը, այս տարի Եվրոպական ժառանգության օրերին կմիանա միջոցառումների  հատուկ ծրագրով:

Թանգարանի ներքին բակում  ներկայացվող  պատկերազարդ  պաստառների ցուցահանդեսն իր այցելուներին մտովի կտեղափոխի ուրարտական և աքեմենյան դարաշրջաններ՝ ներկայացնելով համաշխարհային  ժառանգության մաս կազմող եզակի հուշարձանի՝ Պերսեպոլիսի և Հայաստանի հնագիտական ժառանգության կարևոր արժեքի՝ Էրեբունիի պատմությունն ու մշակույթը:

Երևանի քաղաքապետարանի մշակույթի  բաժնի պետ Էմին Թորոսյանն իր խոսքում նշեց, որ  այս ցուցահանդեսը  վառ ապացույցն է նրա, որ երկու ժողովուրդները դեռ վաղ անցյալից մշակութային համագործակցությամբ կապված են եղել միմյանց: «Այնտեղ, այն խաչմերուկներում, որտեղ մշակությաին համագործակցությունը եղել է և երկու ժողովուրդները համատեղ են կարողացել կերտել իրենց մշակույթները, այսօր դրա վառ ապացույցը կլինի այս ցուցահանդեսը»:

Սակայն  արգելոց-թանգարանը ծրագրի  խորագրին համահունչ կազմակերպել է  մեկ միջոցառում  ևս ՀՀ մշակույթի նախարարության Երաժշտագիտական գրադարանի հետ համատեղ: Սեպտեմբերի  26-ին գրադարանի  անձնակազմից կազմված երգչախումբը ներկայացնելու է  «Վանի տարածաշրջանի ժողովրդական երգարվեստը»:

Երաժշտական գրադարանի տնօրեն Գուլո Նահատակյանի տեղեկացմամբ՝ գրադարանը կազմել ու  հրատարակության է հանձնել «Եղեռնապատումը երաժշտության մեջ» մատենագիտությունը, որտեղ էլ ընդգրկված են 252 երաժշտական ստեղծագործություններ՝ նվիրված հայոց ցեղասպանության 100-րդ տարելիցին և  Արևմտյան Հայաստանի բանավոր երգերի նոտագրված տարբերակը, որոնք էլ  պատրաստվել են  հետագա կատարումների համար:

Այսօր միջոցառման շրջանակներում Հայաստանի և Իրանի ԻԿՕՄ-ների  ու Հայաստանի ԻԿՕՄՕՍ-ի հետ կնքվեց նաև եռակողմ հուշագիր, որով  էլ ազդարարվեց  երկու երկրների միջև առավել ակտիվ համագործակցությունը: Իրանի ԻԿՕՄ-ի ազգային կոմիտեի նախագահ  Սայեդ Մուհամեդ Բեհեշթիի խոսքով՝ այս հուշագիրը մեծ դերկատարություն կունենա  երկու ազգերի մշակույթների պահպանության հարցում:

«Այս հուշագրով մենք շատ մեծ հաջողություններ կարձանագրենք: Մեր մշակույթներում   շատ նմանություններ կան և մենք կարող ենք համատեղ աշխատանքի  շնորհիվ   զարգացնել մեր մշակույթները:  Իսկ նմանօրինակ ցուցահանդեսները հնարավորություն  կտան երկու ժողովուրդներին  ծանոթանալ  մեկմեկու  մշակույթներին»,- ասում է Իրանի ԻԿՕՄ-ի ազգային կոմիտեի նախագահը:

Արգելոց –թանգարանում իրականացվող միջոցառումները կավարտվեն ուրարտական և աքեմենյան հնագույն  մշակույթների վերաբերյալ հետաքրքիր դասախոսություններով, որոնք  կանցկացնեն Իրանի և Հայաստանի հնագիտության, մշակույթի և արվեստի լավագույն մասնագետները:

Back to top button