Վերլուծական

Ի՞նչ ակնկալել ՀԱՊԿ- ում Հայաստանի նախագահությունից

hasmikmartirosyan

Հայաստանը ստանձնել է Հավաքական անվտանգության պայմանագրի կազմակերպության նախագահությունը: Սա քննության ժամանակաշրջան է, որի ընթացքում մեր երկիրը պետք է փորձարկի ՀԱՊԿ-ի կենսունակության շրջանը՝ ՀՀ անվտանգության պահպանման տեսանկյունից: Ո՞րն է այն սահմանը, որի հատման դեպքում Կոլեկտիվ անվտանգության պայամանգրի դրույթները կիրառելի կլինեն կազմակերպության կողմից։

 

Հայաստանի նախագահությունը Հավաքական անվտանգության պայմանագրի կազմակերպությունում  կարևոր է մի քանի առումներով: Ստանձնելով նախագահությունը՝ Հայաստանն  իր անվտանգությանը սպառնացող յուրաքանչյուր վտանգ պետք է բարձրացնի  ՀԱՊԿ շրջանակներում և պահանջի համապատասխան հոդվածի կիրառում, որը վերաբերում է ՀԱՊԿ անդամ երկրների նկատմամբ ոտնձգություններին: Նման տեսակետ այսօր հայտնեց Միջազգային և անվտանգության հարցերի հայկական ինստիտուտի հիմնադիր նախագահ Ստյոպա Սաֆարյանը`  մատնանշելով այս տարի գրանցված սահմանային խախտումներն ու Ադրբեջանի կողմից մինչ օրս չօգտագործած զինատեսակների կիրառումը։

Քաղաքագետը նկատում է, որ չպետք է ոչ մի իրավիճակ խանգարի ՀՀ-ին քննարկել իր ռազմաքաղաքական անվտանգությանն ուղղված սպառնալիքները կազմակերպությունում: ՙՀայաստանը ոչ միայն սահմանին պետք է պատժի հակառակորդին, այլև միջազգային հարթակներում ու միջազգային կառույցների միջոցով Ադրբեջանին զսպելու քաղաքականություն ունենա, իսկ ՀԱՊԿ-ն էլ պետք է դառնա այդպիսի կառույցներից մեկը, այլապես այս մոտեցմամբ  կազմակերպությունը չի ավելացնում ՀՀ պաշտպանվածությունը, իսկ պաշտպանության իրավունք Հայաստանն ունի՚,- նշում է Ստյոպա Սաֆարյանը:

Քաղաքագետը շեշտում է, որ կան զինատեսակներ, որոնք օգտագործվում են բացառապես պատերազմական իրավիճակներում, և այն, ինչ կիրառվեց Ադրբեջանի զինուժի կողմից հայ-ադրբեջանական սահմանում՝  հավասարազոր էր պատերազմ սկսելուն: «ՀԱՊԿ ունի կոնսուլտացիոն մարմին, որը հենց որոշում է նման հարցերը: Եվ, ի վերջո, ՀԱՊԿ անդամ  երկիրն ինքն ունի սահմանումներ՝ իր անվտանգությանը սպառնացող վտանգների  համար: Չեմ կարծում, որ առանձնակի դժվար է կլինի սահմանել, թե ինչ է պատերազմը: Այլ խնդիր է, որ մինչև այժմ ՀԱՊԿ- ն ցանկություն չի ունեցել քննարկել այդ խնդիրը»,- ասում է Ստյոպա Սաֆարյանը։

2008-ին,  երբ Հայաստանը ստանձնեց ՀԱՊԿ-ի նախագահությունը, ՀՀ անվտանգության պահպանման համար կարևոր մի շարք համաձայնագրեր ստորագրվեցին, հիշում է նա և հույս հայտնում, որ կրկին նախագահելով կազմակերպությունը՝ սա լավ հնարավորություն կստեղծվի փորձարկել դաշինքի նշանակությունը  անվտանգության պահպանման առումով:

Ստյոպա Սաֆարյանը մասամբ է համաձայն պաշտպանության նախարար Սեյրան Օհանյանի այն մտքի հետ, թե մի կրակոցի համար չեն կարող դիմել ՀԱՊԿ-ին։ ՙՃշմարտություն կա, բայց երբ արդեն հակառակորդը օգտագործում է զինատեսակներ, որոնք պատերազմին բնորոշ իրավիճակ են ստեղծում, պետք չէ հապաղել՚,- կարծում է քաղաքագետը:

Back to top button