Հասարակություն

Էկոլրագրություն.նոր առարկա ԵՊՀ Ժուռնալիստիկայի ֆակուլտետում

sonahakobyan
«Բնապահպանական խնդիրների լուսաբանման առանձնահատկությունները» ծրագրի շրջանակներում այսօր և վաղը ԵՊՀ ժուռնալիստիկայի ֆակուլտետում կանցկացվի սեմինար բնապահպանական թեմաներով գրող լրագրողների և լրագրության ֆակուլտետների դասախոսների և ուսանողների համար: Սեմինարը Հայկական օնլայն լրատվամիջոցների և լրագրողների ասոցիացիայի, ԵՊՀ Ռադիոհեռուստատեսային ամբիոնի և բնապահպանական տեղեկատվության հասարակական Օրհուս կենտրոնի նախաձեռնությունն է: Նպատակը ստեղծել լրագրողների խումբ, ովքեր հետագայում կաշխատեն նաև էկոլրագրության ասպարեզում` արդեն որպես մասնագիտացած լրագրողներ:

Նոր ուսումնական տարվանից ԵՊՀ ժուռնալիստիկայի ֆակուլտետում կներմուծվի և կդասավանդվի նոր առարկա` էկոլրագրություն: Առարկան կներմուծվի ավագ կուրսերում` կամընտրական սկզբունքով: Բոլոր այն ուսանողները, ովքեր կընտրեն այս առարկան, ըստ էության հետագայում կաշխատեն հենց այս բնագավառում` արդեն որպես մասնագիտացած լրագրողներ, «Ռադիոլուրի» հետ զրույցում նշեց Հայկական օնլայն լրատվամիջոցների և լրագրողների ասոցիացիայի նախագահ Դավիթ Ալավերդյանը:

Նախաձեռնությունը շատ է կարևորում նաև ԵՊՀ դասախոս, բնապահպան Կարինե Դանիելյանը: Միևնույն ժամանակ գտնում է, որ ճիշտ մասնագետներ ունենալու համար միասյն դասախոսություններն ու տեսական գիտելիքները բավարար չեն, անհրաժեշտ են նաև գործնական դասընթացներ` ԵՊՀ պատերից դուրս:

Սեմինարի նյութերն, ի դեպ,  կամբողջացվեն առանձին ժողովածուի մեջ, որն էլ հետագայում կհանդիսանա էկոլրագրություն առարկայի դասագիրք: Ուսանողները կկարողանան օգտվել նաև դասագրքի էլեկտրոնային տարբերակից, որը կկարողանան ներբեռնել ԵՊՀ կայքից: Բացի գործող դասախոսներից` դասախոսություններին կհրավիրվեն նաև ոլորտի փորձագետներ:

Back to top button