Հասարակություն

Արցախում մեկնարկել են Ֆրանսիական օրերը

Լուսինե Ավանեսյան
«Ռադիոլուր»- Ստեփանակերտ

Արցախում մեկնարկել են Ֆրանսիական օրերը:  Դրանց շրջանակում Ստեփանակերտ են ժամանել մոտ երկու հարյուր հյուրեր ՝այդ թվում «Ֆրանսիա-Ղարաբաղ» բարեկամության շրջանակի, Արցախի համայնքների հետ բարեկամացած Ֆրանսիական քաղաքների, «Սատար Ղարաբաղին» միության եւ Ֆրանսիայի հայկական համայնքի ներկայացուցիչներ,արվեստագետներ ու լրագրողներ։

Փառատոնի պաշտոնական մեկնարկը տրվել է այսօր  Ստեփանակերտի Ֆրանսիայի պուրակում՝ Արցախի եւ Ֆրանսիայի բարեկամությունը խորհրդանշող «Հավերժություն» քանդակի հանդիսավոր բացման արարողությամբ: Քանդակի հեղինակը արմատներով Հալեպից է, այժմ ապրում է   Մարսելում:   Այսօր տեղի է ունեցել նաև «Պոլ Էլյուարի տուն» անունով ֆրանկոֆոնիայի կենտրոնի հիմնարկեքի արարողությունը:

Վաղը Ֆրանսիական օրեր փառատոնը հյուրընկալվելու է  Շուշիում: Տեղի կունենա Եզնիկ Մոզյանի անվան արհեստագործական ուսումնարանի բացումը: Այս ուսումնարանը նորույթ կլինի ոչ միայն արցախյան, այլև հայաստանյան կրթական համակարգում:Գործելու է  ֆրանսիական մոդելով՝ մոտ 500 ուսանողների  շինարարի  կրթություն ստանալու հնարավորություն տալով:

Շուշիի կերպարվեստի պետական թանգարանում  էլ տեղի կունենա անիմացիոն ֆիլմերի եվրոպական առաջատար «Ֆոլիմաժ» ստուդիայի աշխատանքների շնորհանդեսը։ Առաջիկա օրերին Շուշիում եւ Ստեփանակերտում ստուդիայի ֆիլմերի ցուցադրևություններ են նախատեսվում: Նաև  ուսումնական դասընթացներ են սկսվել։

Վաղը Ստեփանակերտի Ս. Շահումյանի անվան պուրակում կանցկացվի Ղարաբաղ-Ֆրանսիա բարեկամությունը խորհրդանշող բացիկների պատրաստման մրցույթ։Երեկոյան Վերածննդի հրապարակում կլինի  ֆրանսահայ երգիչ Պատրիկ Ֆիորիի բացօթյա համերգը։

Այսօր  տեղի կունենա նաեւ «Ղարաբաղ-Ֆրանսիա» եւ «Ֆրանսիա-Ղարաբաղ» բարեկամության շրջանակների ու բարեկամացած քաղաքների ներկայացուցիչների համատեղ նիստ, որի ընթացքում կքննարկվեն տարբեր ոլորտներում՝ այդ թվում նաեւ կրթության, առողջապահության, մշակույթի եւ զբոսաշրջության, համագործակցության ընդլայնմանը վերաբերող մի շարք հարցեր։

Back to top button