Մշակույթ

Մեկնարկում է «Գութան» փառատոնը

aidaavetisyan
Սեպտեմբերի 28-ին  Գաֆէսճյան քանդակների պարտեզում Երևանի քաղաքապետարանի և մշակույթի նախարարության աջակցությամբ  կմեկնարկի «Գութան 2015» Հայաստանի ազգագրական  երգի -պարի փառատոնը։ Կմասնակցեն  ազգային  համույթներ, որոնք կներկայացնեն Հայաստանի տարբեր շրջանների երգերն ու պարերը, ինչպես նաև ավանդական երգի ու պարի երախտավորներին նվիրված կարճաժամկետ ֆիլմերի ցուցադրություններ: Անցած տարի մեկնարկած «Գութան» փառատոնի կազմակերպիչ, «Մրրո» Հայ ազգային երգարվեստի կենտրոնի ղեկավար Արսեն Գրիգորյանի նպատակն է այն դարձնել ամենամյա եւ ժողովրդին տալ ավանդական ու մոռացված երգերն ու պարերը վերհիշելու հնարավորություն:

 

 

Դրվագը նախորդ տարվա «Գութան» ազգային  երգի-պարի փառատոնից է:  Անցած տարի մեկնարկած  փառատոնն այս տարի ևս  կունենա հնարավորություն՝ ունկնդրին կենդանի հնչողությամբ ներկայացնել  ազգային՝ նաև մոռացված  ստեղծագործությունները: Փառատոնի կազմակերպիչ, «Մրրո» Հայ ազգային երգարվեստի կենտրոնի ղեկավար Արսեն Գրիգորյանի  նպատակն է այն դարձնել ամենամյա՝ վերապրեցնելով հինն ու մոռացվածը, այն անաղարտորեն փոխանցել նաև մատաղ սերնդին:

Արժևորել ու գնահատել ազգագրության բնագավառի  երախտավորներին, սա փառատոնի կարևորագույն մասն է, ասում է կազմակերպիչը:  Ամեն տարի ընտրում են երախտավորների ծաղկաբույլ, որոնց մասին էլ պատրաստվում են կարճամետրաժ ֆիլմեր՝ հնարավորություն տալով երիտասարդներին՝ ճանաչել ազգային երգ ու պարի  մեծերին:  Նախորդ տարի պատրաստվել էր մի ֆիլմ Հայրիկ Մուրադյանի մասին։ Այս տարի եւս կներկայացվի նոր տեսաֆիլմ ազգագրական երգերի այս հրաշալի կատարողի մասին, ասում է փառատոնի կազմակերպիչ Արսեն Գրիգորյանը:

«Քանի որ տարին հոբելյանական է՝ 110-ամյակն է նշվում»:

«Կարին»ավանդական երգի պարի խմբի ղեկավար Գագիկ Գինոսյանի խոսքով՝ այս փառատոնը լուծում է գերխնդիր՝ հեռուստատեսությունն այսօր հեղեղված է օտարամոլ երաժշտությամբ ու պարերով, իսկ այս փառատոնը մատաղ սերնդին  հայեցի դաստիարակելու, ազգային արմատներին վերադարձնելու  գործում կարևոր հարց է լուծում: Այս տարի փառատոնը հանդես կգա նորամուծությամբ: Հայաստանից և Արցախից մասնակից յուրաքանչյուր խումբ ներկայացնելու է ամբողջական Հայաստանի մի տարածաշրջանի մշակույթ:

Այն, որ «Գութանը» մատաղ սերնդին իր ազգային արմատներին հավատարիմ  դաստիարակելու գործում մեծ նշանակություն ունի հաստատում է նաև  «Նուբար» ազգագրական խմբի ղեկավար Լուսինե Նազարյանը: Ըստ նրա՝ այս փառատոնում պետք է ներգրավել շատ ու շատ երիտասարդների:

Իսկ «Ակունք» ազգագրական համույթը դեռևս երկմտում է Շատախի կամ Շիրակի դաշտավայրի մշակույթը ներկայացնելու մեջ: Համույթի ղեկավար Սարգիս Ալավերդյանը, սակայն, նշում է, որ իրենց համար կարևորը  ստեղծագործությունները բնօրինակին հավատարիմ ներկայացնելն է:

Կազմակերպիչները լիահույս են, որ մի օր համշենահայերից կազմված համույթներն էլ  կմասնակցեն ազգային երգ ու պարի այս փառատոնին:

Back to top button