Հասարակություն

Այսօրվանից օդի ջերմաստիճանը կնվազի

aidaavetisyan

Հանրապետությունում այսօրվանից կնկատվի օդի ջերմաստիճանի անկում՝ 3- 4 աստիճանով, իսկ առաջիկա 5 օրերին գիշերային ժամերին  կանխատեսվում է անձրև և ամպրոպ, առանձին հատվածներում՝ կարկուտ:

 

Հանրապետությունում վերջին 5 օրերին նկատվող  բարձր ջերմային ֆոնը, ըստ ՏԿԱԻՆ «Հիդրոմետ» ծառայության օդերևութաբանության կենտրոնի պետի տեղակալ Գագիկ Սուրենյանի,  պայմանավորված է արևադարձային տաք օդային հոսանքների ներթափանցմամբ: Օդի ջերմաստիճանն այդ օրերին եղել է նորմայից 3-4 աստիճանով բարձր:

Այսօրվանից, սակայն, օդերևութաբանական իրադրությունը հանրապետության տարածքում փոփոխվում է:  Երկիր են ներթափանցում սառը օդային հոսանքներ:  Արդյունքում՝ այսօր և վաղը օդի ջերմաստիճանը կնվազի 3- 4 աստիճանով, իսկ Լոռիում, Տավուշում, Սյունիքում  և Արցախում այն  կնվազի  5 — 7աստիճան:

«Հատկապես հանրապետության հյուսիսային և արևելյան շրջաններում առաջիկա 5 օրերին երեկոյան ժամերին գիշերը  սպասվում է անձրև և ամպրոպ, առանձին հատվածներում՝ հնարավոր է նաև կարկուտ: Երեկոյան ժամերին կարճատև անձրևների հավանականություն կա նաև մայրաքաղաքի առանձին հատվածներում»,- ասում է Գագիկ Սուրենյանը։

Օդերևութաբանական կանխատեսումների համաձայն՝ այնուհետև  օդի ջերմաստիճանը կմոտենա նորմային: Առաջիկա 5 օրերին մայրաքաղաքում այն ցերեկային ժամերին կտատանվի  30-32 աստիճանի սահմաններում, որը համապատասխանում է աշնանային եղանակին:

Back to top button