Հասարակություն

Գյուղատնտեսական տարին բարեհաջող էր.Սերգո Կարապետյան

hasmikdilanyan
Գյուղատնտեսության նախարար Սերգո Կարապետյանն  այսօր հանդիպել է լրագրողների  հետ ու ներկայացրել այս տարվա անցած յոթ ամիսների ընթացքում  ոլորտում գրացված արդյունքները: Նախարարի խոսքով, ընդհանուր առմամբ տարին բարեհաջող է, ցրտահարություն չի գրանցվել, սակայն,  բանջարեղենի վրա  ու հատկապես լոլիկի վրա իր բացասական ազդեցությունն է ունեցել բարձր ջերմաստիճանը: Կարտոֆիլի շուկայում  գրանցված բարձր գինը  ոլորտի պատասախանատուն կրկին բնակլիմայական պայմաններով է պայմանավորել՝  Արարատյան դաշտավայրում վաղահաս կարտոֆիլը ջերմային բարձր ռեժիմի պատճառով ամբողջությամբ  հողից հանվել ու վաճառվել  էր: Արդյունքը՝ հատկապես օգոստոսին, կարտոֆիլի  դեֆիցիտն էր շուկայում:   Հետևելով գնային տատանումներին՝  Սերգո Կարապետյանը հայտարարել է, որ վերջին երեք օրերին կարտոֆիլի գինը կտրուկ նվազել է: Նախարարը վստահեցրել է՝ կարտոֆիլի բերքն այնքան է, որ ոչ միայն կբավարարի բնակչությանը, այլ նաև նախորդ տարիների նման կարտահանվի: Արդեն երկու  օր է, որ սկսվել  է խաղողի մթերումը, մթերվել է  4500 տոննա  խաղող: Վերամշակող ընկերությունները  գյուղացուց կվերցնեն խաղողի ողջ բերքը, սակայն, գուցե վճարումներն ուշանան:

 

 

Ամիսներ առաջ գյուղատնտեսության ոլորտի տարբեր փորձագետներ ահազանգում էին՝ վերամշակող ընկերությունները,  ռուսական ռուբլու արժեզրկմամբ պայմանավորված,  ֆինանսական լուրջ խնդիրներ ունեն: Գինու և  կոնյակի արտահանումը կտրուկ  նվազել է, ռուսական ռուբլին արժեզրկվել, իսկ արտահանված խմիչքի դիմաց ռուսական ռուբլիով կատարած վճարումները չնչին գումար են կազմում: Փորձագետների՝ ամիսներ շարունակ հնչող հայտարարություններն այսօր նաև  գյուղատնտեսության նախարարը հաստատեց՝ վերմշակող ընկերություններն իսկապես խնդիրներ ունեն, սակայն, նրանք  պատրաս են  գյուղացուց ընդունել մինչև վերջին կգ խաղողը:  Բերքը կընդունեն, սակայն, կուշացնեն վճարումները՝  վերամշակող ընկերություններին  էլ պետք է հասկանալ ու աջակցել,- ասաց  Սերգո Կարապետյանը: Վճարումների ուշացման մասին  նաև գյուղացիներն են տեղյակ. «Եթե անցյալ տարի մենք մինչև դեկտեմբերի վերջ ամբողջապես մթերված խաղողի դիմաց  վճարումները կատարվեցին, այս տարի հնարավոր մի քիչ ձգձգվի մինչև մարտ-ապրիլ ամիս»:

Այս տարի առատ է ոչ միայն խաղողի բերքը: Ընդհանրապես սա եզակի տարի էր,որ ցրտահարություն չգրանցվեց, սակայն,    հատկապես  բանջարեղենի վրա իր բացասական ազդեցությունն ունեցավ ամռան  կեսերից գրանցված բարձր ջերմային ֆոնը: Վաղահաս կարտոֆիլն ավելի արագ հողից հանվեց, ինչը շուկայում դեֆիցիտի ու կարտոֆիլի բարձր գնի  պատճառ դարձավ, 40 և ավելի դրական ջերմաստիճանը նաև լոլիկի  բերքի վրա ազդեց: 78 համայնքներում տեղացած կարկուտը գյուղատնտեսությանը մոտ յոթ միլիարդ դրամի վնաս  հասցրեց: 2014-ին  վնասը կազմում էր 17,5 մլրդ դրամ: Կառավարությունը քննարկում է կարկտահարված համայնքների օժանդակության հարցը:

«Պետությունը չի կարող ամբողջությամբ փոխհատուցել, սակայն, օժանդակել կարող ենք»,- անկեղծացավ ոլորտի պատասխանատուն: Ոլորտի պատասխանատուն հերքեց մամուլի հրապարակումներն այն մասին, որ  նախարարի հայրենի Արտաշատ  քաղաքում գործող  Արտֆուդ ընկերությունը հրաժարվում է կարկտահարված պտուղ-բանջարեղենը մթերել, ավելին, խոսակցությունները Սերգո Կարապետյանը  անլուրջ համարեց.«Այդպիսի դեպք չի եղել, եթե այդպիսի դեպք կա, դուք  բերեք ներկայացրեք, ով, անուն-ազգանունը և որ համայնքից: Այդպիսի բան չկա: Բերքն ամբողջապես մթերվել է: Նույնիսկ կարող եմ ասել,որ այս տարի արտահանման ծավալներն այնքան մեծ են,որ արտահանվել է անգամ կարկտահարված բերքը: Դրա պահանջարկը կար, մթերման առումով ոչ մի խնդիր չունենք»:

Բերքառատ տարվա ընթացքում ավելացել են նաև արտահանման ծավալները,  արտահանման մեջ գերակշռում է Եվրասիական տնտեսական միության երկրների մասնաբաժինը, մասնավորապես Ռուսաստանին բաժին է ընկել արտահանման ընդհանուր ծավալի 82.9 %-ը, 2014 թվականի նույն ժամանակահատվածի 32.9 %-ի դիմաց: Այս օրերին էլ արտահանման գործըթնացը շարունակվում է: Վերին Լարսի անցակետում ամեն ինչ կարգին է, իսկ  մոտ ապագայում  դժվար թե ԵՏՄ անդամ երկրներում  առևտուրը ռուսական ռուբլիով կազմակերպվի:

Back to top button