Վերլուծական

Արտահերթ ընտրություններում Էրդողանի կուսակցությունը նվազ ձայներ կհավաքի. թուրք վերլուծաբան

karenghazaryan
Թուրքիայում նոյեմբերին կայանալիք խորհրդարանական վաղաժամկետ ընտրություններում Էրդողանի կուսակցությունը առավել նվազ ձայներ կհավաքի եւ ստիպված կլինի նորից մտածել կոալիցիա ձեւավորելու մասին: Այս համոզմունքն է այսօր հայտնել Երեւանում կայացած հայ-թուրքական հարաբերություններին նվիրված խորհրդաժողովի թուրք մասնակից, վերլուծաբան Օզգյուր Ունլուհիսարչիկլին: Վերլուծաբանը անդրադարձել է նաեւ սպասվող ընտրությունների արդյունքում քաղաքական ուժերի հնարավոր դասավորության եւ դրա՝ Թուրքիայի արտաքին քաղաքականության վրա հնարավոր ազդեցության խնդրին՝ մասնավորապես հայ-թուրքական հնարավոր օրակարգի առումով:

 

Էրդողանը հույս ունի, որ նախորդ խորհրդարանական ընտրություններից հետո Թուրքիայում եւ նրա շուրջ ծավալված իրադարձությունները կնպաստեն, որ վաղաժամկետ խորհրդարանական ընտրություններում ընտրողները նախընտրեն կայունությունը եւ անվտանգությունը՝ առավել շատ ձայներ տալով իշխող կուսակցությանը: Սակայն, վերլուծաբան Օզգյուր Ունլուհիսարչիկլին վստահ է, որ Էրդողանի այդ սպասումները չեն արդարանա: Ըստ թուրք վերլուծաբանի՝ հարցումները ցույց են տվել, որ քրդական կուսակցությունը կպահպանի իր ձայներն ու կավելացնի, մինչդեռ իշխող կուսակցության օգտին տրված ձայները կպակասեն: Դրան կնպաստեն նաեւ Թուրքիայում եւ նրա շուրջ վերջին շրջանում ծավալված իրադարձությունները, այդ թվում՝ իշխող կուսակցության ներկայացուցիչների շուրջ պայթած կոռուպցիոն սկանդալները:

Թուրք վերլուծաբան Օզգյուր Ունլուհիսարչիկլին համոզված է, որ իշխող կուսակցությունը, համարժեք ձայներ կրկին չհավաքելով, ստիպված կլինի կոալիցիա կազմել: Ըստ վերլուծաբանի՝ կախված հենց այդ կոալիցիայից կարելի է ասել, թե հայ-թուրքական հարաբերությունների առումով դրական, թե բացասական օրակարգի է պետք սպասել: Նրա խոսքով՝ եթե կոալիցիա ձեւավորվի քրդական Ժողովուրդների դեմոկրատիա կուսակցության հետ, ապա՝ հնարավորությունները մեծ են, որ Հայաստանի նկատմամբ Թուրքիան կձեւավորի դրական օրակարգ: Օզգյուր Ունլուհիսարչիկլին ասաց, թե իր համար մեկ բան հստակ է՝ եթե հաջորդ անգամ, երբ բանակցություններ լինեն Հայաստանի եւ Թուրքիայի միջեւ, ապա պետք է հայ-թուրքական հարաբերությունները ապակապակցել երկու հանգամանքից: Առաջինը, թուրք վերլուծաբանի ձեւակերպմամբ, «15 թվականի իրադարձություններից ապակապակցումն է» եւ երկրորդը՝ պետք է ապակապակցվեն թուրքական հարաբերությունները հայ-ադրբեջանական տարաձայնություններից: Վերլուծաբանը դա բարդ խնդիր է համարում, սակայն, կարծում է, որ այդ դեպքում միայն խորհրդարանական ընտրություններից հետո Հայաստան-Թուրքիա հարաբերություններում դրական օրակարգ ձեւավորելու հնարավորություն կարող է լինել:

Հայ փորձագետները, սակայն, կարծում են, որ դրական սպասումներն այսօր հիմք չունեն: Տարածաշրջանային հետազոտությունների կենտրոնի փորձագետ Դավիթ Շահնազարյանի խոսքով՝ ինչ էլ լինի, սկիզբը պետք է Անկարայից լինի, քանի որ հենց այնտեղ մարեցին ցյուրիխյան հայտնի արձանագրությունները:

Նշենք, որ հայ-թուրքական հարաբերություններին նվիրված այսօրվա խորհրդաժողովը կազմակերպել էր Գլոբալիզացիայի եւ տարածաշրջանային համագործակցության կենտրոնը՝ Ֆրիդրիխ Էբերտ հիմնադրամի ֆինանսական աջակցությամբ:

Back to top button