Հասարակություն

Նորապատի դպրոցում փորձնական արեւմտահայերեն կդասավանդվի

satikisahakyan

Նոր ուսումնական տարվա նախաշեմին Արմավիրի մարզում դպրոցների տնօրենների օգոստսյան խորհրդակցությունում կրթության և գիտության նախարարության հանրակրթության վարչության պետ Նարինե Հովհաննիսյանը ներկայացրել է «Կրթության մասին» օրենքում կատարված փոփոխությունները: Հանրակրթական բոլոր դպրոցների դռները բաց են լինելու կրթության առանձնահատուկ պայմանների կարիք  ունեցող երեխաների առջև, բացառությամբ՝  երեք  կատեգորիաների, որոնց համար նախատեսված է հատուկ ուսուցում:

 

Նոր ուսումնական տարվա շեմին սովորաբար ամփոփվում է  նախորդ ուստարվա ընթացքում կատարված աշխատանքը: Արմավիրի մարզի կրթության, մշակույթի և սպորտի վարչության պետ Գայանե Սայադյանը ներկայացրեց կրթության ոլորտի հաջողություններն ու բացթողումները: Նախորդ ուսումնական տարում հիմնական կրթության  գերազանցության նմուշի դիպլոմ է ստացել 46 շրջանավարտ, գերազանց առաջադիմությամբ են սովորել 4875 աշակերտ:

Կրթական ոլորտում կազմակերպված տարբեր միջոցառումներում մարզի դպրոցների աշակերտներն ունեցել են մեծ հաջողություններ, արժանացել են պարգևների և դիպլոմների, իսկ   Վաղարշապատի թիվ 4 հիմնական դպրոցի աշակերտներ Բարսեղ Աթանյանն ու Շանթ  Սարգսյանը «Ամենախելացին» հեռուստամրցույթի եզրափակիչ փուլի հաղթողներն են: Սրանց կողքին սակայն մարզի դպրոցները չեն փայլում  վարկանիշավորմամբ:

Համընդհանուր ներառական կրթությունն այսուհետ պարտադիր պահանջ է,  կրթության առանձնահատուկ պայմանների կարիք ունեցող երեխաների առջև բաց են լինելու հանրակրթական դպրոցների դռները, բացառությամբ նրանց, ովքեր ունեն հատուկ ուսուցման կարիք մասնագիտացված դպրոցներում:

«Կրթության մասին» օրենքի փոփոխությունները Արմավիրի մարզի դպրոցների տնօրեններին ներկայացրեց  կրթության և գիտության նախարարության հանրակրթության վարչության պետ Նարինե Հովհաննիսյանը:

Առանձնահատուկ պայմանների կարիք ունեցող երեխաների հետ կտարվի հատուկ աշխատանք, նրանց կօգնի նաև պետական բյուջեի հաշվին դպրոցներին տրվող նոր հաստիքով ուսուցչի օգնականը, յուրաքանչյուր 100 աշակերտին՝ մեկ օգնական հաշվարկով: Տասներկուամյա կրթությունը պարտադիր է: Հիմնական դպրոցի գրեթե 40000 շրջանավարտից մոտ 3000-4000-ը չի շարունակում ուսումը տարբեր պատճառներով:

«Մեր երեխաներին ուզում ենք տեսնել մրցունակ և մենք պետք է օգնենք նրանց շարունակելու ուսումը ավագ դպրոցներում, քոլեջներում կամ ուսումնարաններում»,- ասաց Նարինե Հովհաննիսյանը: Այս նպատակով առաջարկվեց ավագ դպրոցներում ստեղծել արհեստագործական հոսք: Այս  առաջարկին  արձագանքեց Այգեկի միջնակարգ դպրոցի տնօրեն Ռուզաննա Արիստակեսյանը՝ նշելով՝ երեխաներին պետք է թույլ տալ նաև աշխատել և օգնել ընտանիքին:

Հատուկ ուշադրություն  պետք է դարձնել աշակերտների բացակայության վրա՝ բացահայտելով պատճառները:

Դպրոցներում ստեղծվելու են նաև հայրենասիրական դաստիարակության պատանի երկրապահի ակումբներ, մարզի 6 դպրոցում փորձնականորեն ուսուցանվելու է ազգային երգ ու պար: Վաստակած հանգստի անցած մանկավարժ Սուրեն Սարգսյանն առաջարկեց դպրոցներում շաբաթվա մեկ օրը հայտարարել արևմտահայերենի խոսակցության օր:  Առաջարկը կարող է փորձարկվել Նորապատի միջնակարգ դպրոցում:

Back to top button