Հասարակություն

Արմավիրի մարզի վթարային երկու շենքերի հետ կապված խնդիրները կլծուվեն այս տարի

satikisahakyan

Արմավիրի մարզի վթարային շենքերում ապրող բնակիչները հուսով սպասում են իրենց բնակարանային պայմանների բարելավմանն ու բնակելի շենքերի ամրացմանը: Մարզում շատ չեն, սակայն կան բազմաբնակարան բնակելի շենքեր, որոնք 3-րդ և 4-րդ կարգի վնասվածություն ունեն: Խնդրի մի մասը կարգավորվելու է այս տարվա ընթացքում: 

Արմավիրի մարզի վթարային շենքերից այս տարի մարզի հրատապ լուծում պահանջող 6-րդ ծրագրի շրջանակներում կբարելավվի միայն  Լենուղի համայնքի 4-րդ կարգի վթարային մեկ և Մայիսյան գյուղի հրդեհված բազմաբնակարան շենքերի բնակիչների բնակարանային պայմանները: Լենուղու  վթարային շենքերը գրեթե ութսուն տարի առաջ են կառուցվել  և ենթակա են քանդման՝ միայն բնակիչներին բնակարաններով ապահովելուց հետո:  Երեք շենքից մարզի հրատապ խնդիրների լուծման  6-րդ ծրագրով  հատկացված միջոցներով միայն վատթարագույն կիսախարխուլ շենքի բնակիչները  ձեռք կբերեն բնակարան, մյուսները սպասելու են հերթի:

Վթարային շենքեր կան նաև Արմավիր և Էջմիածին քաղաքներում, որոնք տարբեր վնասվածության են,  հիմնականում՝ 3-րդ կարգի: Այդ շինությունները ուժեղացման և վերականգնման կարիք ունեն: Նրանց մի մասը վթարային է դարձել շահագործումից կարճ ժամանակ անց: Արմավիրի մարզպետարանի քաղաքաշինության վարչության պետ Կարինե Դանիելյանը տեղեկացրեց, որ վթարային շենքերը հիմնականում տիպային կառույցներ են, որոնք  սխալ նախագծման պատճառով դարձել են վթարային:

Տիպային կառույց է նաև Արմավիր քաղաքի Հանրապետության թիվ 1 շենքը, որի վթարայնության աստիճանը գնահատվել էր 4-րդ կարգի և տարիներ առաջ ամրացվեց ու վերականգնվեց: Էջմիածնում առկա է  բազմաբնակարան 6  վթարային  բնակելի շենք, դրանք նույնպես տիպային կառույցներ են, որոնք նստվածք են տվել և բարձր հարկերում ակնհայտ երևում են  շենքի ճեղքերը, որտեղից էլ  քարերը  թափվում են ներքև: Դրանցից երկուսը գտնվում են կենտրոնական փողոցի Մաշտոց և Կոստանյան խաչմերուկում:

Էջմիածնի քաղաքապետ Կարեն Գրիգորյանը նշեց, որ  վթարային շենքերի ամրացման հետ կապված առաջ է քաշվում նաև այդ շենքերի բնակիչների ժամանակավորապես տարհանման  և տեղավորման խնդիրը, որ նույնպես ծախսերի հետ է կապված:

Բազմաբնակարան  բնակելի շենքերի բարձր հարկերից թափվող քարերի հետ կապված քաղաքապետին առաջարկվել է  ժամանակավորապես լուծում տալ՝ ամրացնելով ցեմենտե շաղախով: Արմավիրի քաղաքաշինության վարչության պետ Կարինե Դանիելյանի հավաստմամբ՝ մարզի վթարային շենքերի վերաբերյալ տեղեկությունները ներկայացվել են կառավարություն:

Բացի բնակելի շենքերից կան նաև մասնավորեցված ձեռնարկությունների կառույցներ, որոնք նույնպես վթարային են: Էջմիածնի  նախկին  «Էլեկտրոն» գործարանի բարձրահարկ կառույցը գտնվում է բնակելի շենքերի հարևանությամբ: Շենքից թափվող քարերը վտանգավոր են դարձել   անցորդների համար և  այդ հատվածում քիչ չեն  դժբախտ պատահարները:

Ցուցադրել ավելի
Back to top button