Մշակույթ

Սայաթ-նովայի նվիրված Վարդատոնը՝ Թբիլիսիում

Գիտա Էլիբեկյան
«Ռադիոլուր»-Թբիլիսի

Վրաստանի մայրաքաղաքում  արդեն 101-րդ անգամ նշվում է  Սայաթ-նովայի նվիրված Վարդատոնը: Այն սկզբնավորվել է դեռ անցյալ դարասկզբին. 1913թ. առաջին անգամ հայ մեծ գրող Հովհաննես Թումանյանի, գեղանկարիչ Գևորգ Բաշինջաղյանի և վրաց գրականագետ Իոսիֆ Գրիշաշվիլու նախաձեռնությամբ տոնվեց բանաստեղծի ծննդյան 200-ամյակը, իսկ մեկ տարի անց սուրբ Գևորգ եկեղեցու բակում տեղի ունեցավ նրա հուշարձանի բացումը: Դրանից հետո թբիլիսահայերը ամեն տարի գալիս են մեկական վարդ դնելու Սայաթ-Նովայի շիրիմին, ընբոշխնելու նրա թողած հրաշալի ժառանգությունը:

 

Ամեն տարի Թբիլիսիի կենտրոնում` ժողովուրդների բարեկամությունը խորհդանշող Մեյդան թաղամասում,  հազարվոր  մարդիկ են  հավաքվում: Նրանք ունկընդրում են մեծ սիրերգի ստեղծագործությունները, որոնք  ծնվել  են  բազմազգ այս երկրում, Կովկասի երեք ժողովուրդների լեզուներով (հայերեն, վրացերեն և թուրքերեն) ու դարձել  բոլորինը.

«Այս տոնն արդեն 101 տարի միավորում է Վրաստանում ապրող բոլոր ժողովուրդներին:  Սիրո, բարեկամության ու համերաշխության երգիչ Սայաթ-Նովան արդեն 300 տարի Կովկասի բոլոր ժողովուրդներին միավորում է երգով ու մշակույթով» ,-իր ելույթում ասաց Վիրահայոց թեմի առաջնորդ Վազգեն եպիսկոպոս Միրզախանյանը:

Սայաթ Նովայի ստեղծագործություններն ունկընդրելու նպատակով Թբիլիսի էին ժամանել Վրաստանի տարբեր  շրջաններից:  Իսկ 80 -ամյա  Սեյրան պապը հատուկ տոնի առիթով Ռուսատանից է եկել. «Մենք Սայաթ-Նովայի երգերի ծարավ ենք զգում», -Ռադիոլուրի հետ զրույցում  ասել է նա:

Թբիլիսիիում բուռն  ծափողջյուններով են ընդունում  Հայաստանի Հանրային Ռադիոյի Սայաթ-Նովա  աշուղական երգի անսամբլին:

«Սայաթ-Նովան հայրենիք է. որտեղ հնչում է Սայաթ-Նովա անունը այնտեղ հայրենիքն առկա է, որովհետև Սայաթ-Նովան դարձել է հայ ժողովրդի և հայրենիքի հոմանիշ: Ուստի պետք է առավելագույնն անել, որ  մեր սերունդները ճանաչեն ու սիրեն  Սայաթ-Նովայի երգերը», -ռադիոլուրի հետ զրույցում ասել է անսամբի գեղարվեստական ղեկավար, ՀՀ ժողովրդական արտիստ Թովմաս Պողոսյանը:

Ցուցադրել ավելի
Back to top button