Հասարակություն

«Վերջին զանգը» Արմավիրի մարզում

satikisahakyan

Արմավիրի մարզի միջնակարգ և ավագ դպրոցներում այսօր «Վերջին դասի» և «Վերջին զանգի» միջոցառումներ էին: Այս ուսումնական տարում հարազատ կրթօջախներին հրաժեշտ տվեց 2437 շրջանավարտ, որից 701-ը՝ ավագ դպրոցներում և վարժարաններում:  Դպրոցներում արգելվել են ճոխ արարողությունները, դրանք սահմանափակվել են «Վերջին դասի» կազմակերպմամբ: 

Արմավիրի մարզի Մայիսյան գյուղի միջնակարգ դպրոցի 228 աշակերտից այսօր դպրոցին հրաժեշտ է տվել  19 շրջանավարտ: Այս դպրոցում է սովորել ու հայրենասիրության դասեր քաղել անցած տարի հայ-ադրբեջանական սահմանում դիվերսիոն խմբին դիմագրավելիս զոհված  Սարգիս Մովսիսյանը:

Դպրոցում «Վերջին դասից» առաջ շրջանավարտները ծաղիկներ դրացին դպրոցի բակում նրա հուշարձանին, իսկ «Վերջին դասն» անցկացվեց ազատամարտիկներին նվիրված դասասենյակում:

Մայիսյանի միջնակարգ դպրոցը նախորդ տարի  ավարտել էր 14 աշակերտ, որից բարձրագույն ուսումնական հաստատությունում է սովորում են 4- ը:  Դպրոցի տնօրեն Իշխան Պետրոսյանը տեղեկացրեց, որ  շրջանավարտները սոցիալական խնդիրների պատճառով չեն կարողանում բարձրագույն կրթություն ստանալ,  այս տարի միասնական քննությանը մասնակցելու է 3 շրջանավարտ:

Բաղրամյանի տարածքի Մյասնիկյանի Արայի անվան միջնակարգ դպրոցն այս տարի 33 շրջանավարտ ունի: Դպրոցի տնօրեն Զուբեիդա Հովհաննիսյանը գերազանց շրջանավարտներին այսօր  հանձնեց շնորհակալագրեր: «Վերջին դասի» կապակցությամբ  շրջանավարտներին   տարբեր զգացողություններ էր համակել՝ ուրախության ու տխրության, վերջին դասը դեռ չավարտված նրանք արդեն  կարոտում են դասընկերներին և  ուսուցիչներին:

Արմավիրի մարզի  6 գյուղական դպրոցների «Վերջին դասին» մասնակցել են  նաև Արմավիրի մարզպետ Աշոտ Ղահրամանյանն ու կրթության վարչության պետ Գայանե Սայադյանը: Նրանք իրենց բարեմաղթանքն են ուղղել շրջանավարտներին, մաղթելով՝ հաղթահարել կյանքի դժվարությունները, ապրել ու արարաել սուրբ հայրենիքում, լինել լավ մարդ:

«Վերջին զանգին» տոնական էր նաև Արմավիր քաղաքը, որտեղ 2 ավագ դպրոցում և «Տիգրան Մեծ» ռազմամարզական վարժարանում  վերջին զանգը հնչեց  256 շրջանավարտի համար:

 

 

Ցուցադրել ավելի
Back to top button