Միջազգային

ՆԱՏՕ­-ի երկրների ԱԳ նախարարները կքննարկեն Ուկրաինայի իրավիճակը

Հյուսիսատլանտյան դաշինքի մասնակից երկրների ԱԳ նախարարները հանդիպում կանցկացնեն Թուրքիայի Անթալիայի նահանգի Բելեկ քաղաքում՝ քննարկելու հավաքական անվտանգության ապահովման հարցերը եւ Ուկրաինայի իրադրությունը: Ինչպես տեղեկացնում է ՏԱՍՍ-ը, ՆԱՏՕ­-ի անդամ 28 երկրների արտաքին գործերի նախարարներից բացի, հանդիպմանը կմասնակցեն նաեւ Աֆղանստանում խաղաղապահ առաքելությանն աջակցող երկրները՝ Հայաստանը, Ադրբեջանը, Բոսնիան եւ Հերցեգովինան, Վրաստանը, Ուկրաինան, Մոնղոլիան, Հարավային Կորեան, Ճապոնիան, Հորդանանի ներկայացուցիչները:

Երկօրյա հանդիպումների ընթացքում կկայանա ՆԱՏՕ-­Ուկրաինա հանձնաժողովի նիստը, որը կբացի դաշինքի գլխավոր քրատուղար Յենս Ստոլտենբերգը: Ինչպես նշել է Թուրքիայի արտաքին քաղաքական գերատեսչությունը, Ուկրաինայի իրադրության քննարկման արդյունքում նախարարները պլանավորում են ընդունել համատեղ հայտարարություն:

Գագաթնաժողովի առաջին օրը կսկսվի Աֆղանստանում դաշինքի նոր՝ «Վճռական աջակցություն» առաքելության իրագործման ընթացքին նվիրված նիստով: Հանդիպման երկրորդ օրը մասնակիցները նախատեսում են քննարկել Վարշավայում 2016 թվականին ՆԱՏՕ-­ի գագաթնաժողովի նախապատրաստական աշխատանքներն ու անցկացումը: Նախարարները եւ պատվիրակությունների անդամները կվերլուծեն նաեւ Սիրիայում եւ Իրաքում ահաբեկիչների դեմ պայքարի ընթացքը:

Ցուցադրել ավելի
Back to top button