Հայրենական մեծ պատերազմի հաղթանակի 70-ամյակը մեծ շուքով նշվեց Արմավիրի մարզում: Արմավիր քաղաքի հրապարակում տոնական շքերթի էին դուրս եկել հայկական ու ռուսական զորամասերի զինվորներն ու սպաները, փրկարարները, «Տիգրան Մեծ» ռազմամարզական վարժարանի սաներն ու պատանի երկրապահները: Հոբելյանական տոնի կապակցությամբ մարզի վետերանները պարգևատրվեցին հոբելյանական հուշամեդալով, արժանացան մարզպետի դրամական պարգևին: Վետերաններն Արմավիրի քաղաքային զբոսայգում ծաղիկներ դրեցին Մեծ հայրենականում զոհվածների հուշարձանին, որից հետո դաշտային ճաշարանում նրանց տրվեց զինվորական ճաշ:
Վաղ առավոտից Արմավիր քաղաքի հրապարակում հնչում էին հաղթանակին նվիրված երգեր, որին հաջորդեց տոնական շքերթը: Տոնի կապակցությամբ այստեղ էին 70 տարի առաջ տարբեր մարտական դիրքերում հաղթանակի բաղձալի լուրը լսած ու յուրովի ուրախացած պատերազմի վետերանները: Նրանք առանց հուզմունքի չեն կարողանում խոսել իրենց կողքին մարտնչած ու զոհված մարտական ընկերների մասին:
Սուրեն Կարապետյանը նույն զգացողությունն ունի նաև այսօր. «Իմ մարտական ընկերն իմ կողքին է զոհվել։ Հավերժ փառք նրանց հիշատակին, փառք Մեծ հայրենական պատերազմի հաղթանակին»։
Սիլվա Պողոսյանն առանձնահաատուկ կերպով է շնորհավորում իր հորեղբորը: Նա պատմում է, որ ինքը դպրոցական էր, երբ սկսվեց Մեծ հայրենականը և հորեղբայրը մեկնեց ռազմաճակատ և սրտատրոփ սպասում էին որևէ լուրի: Հաղթանակից հետո նա ամեն տարի մայիսի 9-ին ծաղիկներ և մի քանի շոկոլադ է նվիրում Սրապիոն Պողոսյանին :
Հաղթանակի հոբելյանական տոնի կապակցությամբ Արմավիրի քաղաքային զբոսայգում կազմակերպվել էր համերգ Արմավիրի մշակույթի տան և ռուսական սահմանապահ զորամասի մշակութային խմբերի մասնակցությամբ: Այգում էր բացվել նաև դաշտային ճաշարանը: Օրվա ճաշացանկում ռուսական կաղամբով ապուրն էր՝ բորշչը , կարմիր ճակնդեղից աղցանն ու մի բաժակ օղի:
Վետերաններին բարեմաղթանքի խոսքն ուղղեց Ռուս սահմանապահ զորամասի Անաստաս Միկոյանի անվան Արմավիրի սահմանապահ ջոկատի հրամանար, գնդապետ Ալեքսանդր Զլոբին՝ նշելով, որ այս հաղթանակը բոլորինս է:
Տոնի կապակցությամբ այսօր տոնական համազգեստ էր հագել նաև, Արմավիրի մարզպետ, ոստիկանության գեներալ-մայոր Աշոտ Ղահրամանյանը, ով ծառայել է Գերմանիայի Դեմոկրատական Հանրապետությունում ՝ Վարշավյան պայմանագրի երկրների զինված ուժերում: Վետերանների համար տոնական միջոցառում և հյուրասիրություն էր կազմնակերպել նաև Արմավիրում տեղակայված ռուսական սահմանապահ զորամասը:
