Իրաքի Շանգալ եզդիաբնակ նահանգում եզդի ժողովրդի ցեղասպանությունը, բռնի կրոնափոխությունն ու աղջիկների և կանանց ստրկավաճառությունը շարունակվում է։ «Միդիա-Շանգալ» եզդիների ազգային միավորում հասարակական կազմակերպության նախագահ Ամո Շարոյանի պնդմամբ՝ « Իսլամական պետություն» ահաբեկչական խմբավորման նպատակն է վերացնել եզդի ժողովրդին, բնաջնջել իրենց հայրենի բնօրրանից՝ Շանգալից:
Չնայած եզդիական ռազմական ջոկատի դիմադրությանը՝ ահաբեկչական խմբավորման գերության տակ են գտնվում 5- 6 հազար մարդ՝ հիմնականում կանայք ու աղջիկներ։
Եզդիների ազգային միավորման նախագահ Ամո Շարոյանը բազմիցս դիմել է միջազգային կառույցներին, Հայաստանում գործող արտասահմանյան դիվանագիտական կառույցներին՝ եզդիների փրկության համար աջակցություն հայցելով, սակայն համոզված է, որ ինչպես Հայոց ցեղասպանության ժամանակ Եվրոպան աչքերը փակեց արդարության առջև, նույն քաղաքականությունը վարվում է նաև եզդիների պարագայում: Միակ հույսը հայ ժողովուրդն է, քանի որ վերջինս ցեղասպանություն վերապրածի ժառանգ է։
Հայաստանաբնակ եզդիների հետ իրավիճակից դուրս գալու ուղիները քննարկելու նպատակով Հայաստանում է Մոսուլի ներկայացուցիչը՝ Ֆախիր Քամալը, ով եզդիական ռազմական ջոկատին զինելու համար դրամական օգնություն է ակնկալում: «2014 թվականի օգոստոսի 3- ից եզդիների նկատմամբ իրականացվող գործողությունները նույնն են, ինչպես կատարվեց 1915 թվականին հայերի նկատմամբ։ Ձեռագիրը նույնն է։ Ինչպես հայերն էին բնաջնջվում իրենց կրոնի համար, այսօր էլ եզդիներն են կոտորվում իրենց հավատքի համար: Եթե իրաքի եզդիները դավանափոխ լինեին և ընդունեին մահմեդականություն, նրանց ոչինչ չէր սպառնա: Ես անձամբ եմ տեսել կանանց այն խումբը, որը գերության էր տարվում»։
Ֆախիր Քամալը նշում է, որ Իրաքի եզդիները ակնկալում են գերտերությունների աջակցությունը, որպեսզի ազատագրեն գերիներին և Շանգալում ստեղծեն եզդիական ինքնավար մարզ:
