Հասարակություն

Վաղարշապատի հիվանդանոցը կվերանորոգվի

satikisahakyan
Նոր ծրագրեր, նոր տարում: Չեխիայի հանրապետության միջև հաստատաված բարեկամության հուշագրով այս տարի կյանքի կկոչվեն մի քանի ծրագրեր, որով Արմավիրի մարզում նախատեսվում է կառուցել ախտորոշման կենտրոն և աղբի վերամշակման գործարան: Չի բացառվում, որ չեխ գործընկերները պատրաստակամություն հայտնեն վերանորգել Վաղարշապատի հիվանդանոցը:

 

Վերջին տարիներին  միջպետական փոխշահավետ  տարբեր համաձայնագրեր են  ստորագրվել Արմավիրի մարզի և մի քանի տարբեր երկրների քաղաքների հետ, որոնց գործունեությունը կարծես թե մնում է թղթի վրա և  առաջխաղացման քայլերը նկատելի չեն:Այս դեպքում խոսքը հատկապես վերաբերում է Իրանի Իսլամակամ հանրապետության Արևելյան ևԱրևմտյան Ատրպատականի նահանգներին: Սակայն այլ է եվրոպական գործընկերության դրվածքը: Նախորդ տարվա սկզբին 2014 թվականի հունվարի 31-ին փոխըմբռնման հուշագիր էր ստորագրվել  Չեխիայի հանրապետության Մորավսկի- Սիլեզսկի երկրամասի և Արմավիրի մարզի միջև, որով կողմերը բարեկամական կապեր են հաստատել  կառավարման, տնտեսության տարբեր ոլորտների՝ գյուղատնտեսության, առողջապահության, մշակույթի, զբոսաշրջության, սպորտի բնագավառներում: Որպես շարունակություն  անցած տարվա հոկտեմբեր ամսին «Արմավիր» բժշկական կենտրոնի և  Չեխիայի Օպավա քաղաքի հիվանդանոցի միջև փոխգործակցության համաձայնագիր էր ստորագրվել  առողջապահության բարելավման նպատակով: Արմավիրի  բժշկական կենտրոնում նախատեսվել է կառուցել նոր ախտորոշման կենտրոն, որը կհագեցվի ժամանակակից սարքավորումներով: Արմավիրի մարզպետ Աշոտ Ղահրամանյանը տեղեկացրեց, որ առաջիկայում  սպասվում է չեխ  գործընկերների այցն Արմավիրի մարզ:

Առողջապահության ոլորտում համագործակցությունը հնարավոր է ընդլայնել: Արմավիրի մարզի Վաղարշապատի հիվանդանոցը հիմնանորոգման խիստ անհրաժեշտություն ունի: Մարզպետի տեղեկացմամբ, հնարավոր է չեխ գործընկերները պատրաստակամություն հայտնեն  նաև  այդ խնդրի լուծման առումով:

Չեխ գործարարների այցով պայմանավորված` նախատեսվում է Արմավիրում բացել աղբի վերամշակման գործարան, որը տարիներ առաջ նույնպես քննարկման խնդիր  էր դարձել, բայց անարդյունք: Հիմնվելու է հայ-չեխական համատեղ ձեռնարկություն:

Իսկ ինչ վերաբերում է Մեծամորում կոյուղու մաքրման կայանի կառուցմանը, ապա այն դեռևս  հեռու է իրականությունից, թեև ժամանակ առ ժամանակ խնդիրը բարձրացվում է, ուսումնասիրվում և այդպես էլ լուծում չի գտնում: Արմավիրի մարզպետ Աշոտ Ղահրամանայնը նշեց, որ խնդրի լուծումը պայմանավորված էր նոր ատոմակայանի կառուցման սոցիալ-տնտեսական  ծրագրերով, բացի այդ քննարկվել է Ջրային տնտեսության պետական կոմիտեի և Գերմանիայի KFW բանկի վարկային ծրագրերի մշակման ընթացքում: Խնդրի լուծումն առայժմ սառեցված է:

Կառուցվածքային  և գերատեսչական փոփոխությունից հետո խնդիրը դարձյալ պետք է վերանայել  Գերմանիայի KFW բանկի հետ միասին, քանի որ միջավայրի հակահիգիենիկ իրավիճակը կարող է այլ խնդիրներ ծնել, բացի այդ տարածքում  գարշահոտությունից փրկություն չկա նույնիսկ ցուրտ եղանակին:

Back to top button