Վերլուծական

Էրդողանը ապրիլի 24-ին կբարձրանա Ծիծեռնակաբերդ եւ ծաղիկներ կդնի անմեղ զոհերի հիշատակին, համոզված է Սարգիս Հացպանյանը

Աիդա Ավետիսյան
«Ռադիոլուր»

ՄԱԿ-ի Գլխավոր ասամբլեայի 69-րդ նստաշրջանում ՀՀ նախագահ Սերժ Սարգսյանի ելույթից հետո ի՞նչ կարող է փոխվել հայ-թուրքական հարաբերություններում և արդյոք իրատեսական է ապրիլի 24-ին  Թուրքիայի նախագահ Ռեջեփ Թայիփ Էրդողանի այցը Հայաստան:

 

Հայ-թուրքական հարաբերությունները պետք է դիտարկել ՀՀ նախագահ Սերժ Սարգսյանի կողմից ՄԱԿ-ում հնչեցված հայտարարության տրամաբանության շրջանակում, կարծում է թուրքագետ Լևոն Հովսեփյանն ու ավելացնում` ՄԱԿ-ի ամբիոնից ելույթը տապալված գործընթացների վերաբերյալ ուղերձ էր միջազգային հանրությանը: Որն էլ հայկական կողմի տրամաբանական քայլերի սկիզբ կարելի է համարել:  Իսկ այն, որ արձանգրությունների հետկանչումը ընդունելի չի լինի միջազգային հանրության համար, թուրքագետն այդ կարծիքին չէ:

ՄԱԿ-ի ամբիոնից նման հարցը հնչեցնելը կարևորում է  տարածաշրջանային փորձագետ Սարգիս Հացպանյանն ու նշում՝ Սերժ Սարգսյանի ուղերձը ՄԱԿ-ի Գլխավոր ասամբլեայում Թուրքիայի դիրքորոշումը փոխելու ուղերձ էր: 2015 թվականին մնացել են ամիսներ և Հայաստանը պետք է հանդես գար ինչ որ նախաձեռնությամբ: Սա էր հենց այդ նախաձեռնությունը: Փորձագետը չի կիսում այն կարծիքը, որ արձանագրությունների ետկանչումը թուրքական խորհրդարանից բացասական կընդունվի միջազգային հանրության կողմից:

Իսկ Թուրքիայի դիրքորոշման հարցում փոփոխությունները  բացառում է թուրքագետ Լևոն Հովսեփյանը և հայտարարում` Հայաստանը  պետք է պատրաստ լինի Թուրքիայի կողմից տարբեր սցենարների, որոնց իրականացման դեպքում,  թուրքագետի ձևակերպմամբ,  Հայաստանը պետք է  ծրագրի քայլեր Անկարայից հետագայում մանևրելու համար: Հստակ ժամանակ չի կարող նշել, բայց կանխատեսում է, որ զարգացումները կլինեն ապրիլի 24-ից առաջ: Իսկ Էրդողանի այցը Հայաստան բացառում է և նշում հրավերն անպատասխան չի թողնվի, սակայն այն չի լինի նախագահի կամ էլ արտգործնախարարի մակարդակով:

Իսկ Թուրքիայի նախագահի այցը Հայաստան իրատեսական է  համարում Սարգիս Հացպանյանը և կարծում, որ Թուրքիան իր  քաղաքական գործիչներից կազմված պատվիրակությամբ  ապրիլի 24-ին կայցելի Հայաստան և ծաղիկներ կդնի Ցեղասպանության զոհերի հիշատակին:

«Երևան գալը, բարձրացումը Ծիծեռնակաբերդ, որն ինքնին որևէ  բան չի նշանակում, բայց դրանով իրենք այս 100-ամյա այս ամբողջ  իրադարձության,  այս մեծ ցավի, մարդկության դեմ գործած հանցագործության բոլոր դափնիները պետք է գրպանեն պարզապես քողի կարգավիճակով և աշխարհը պետք է մատնացույց անի հումանիստ Թուրքիա, մարդասեր Թուրքիա: Տեսնում եք թուրքերն ինչպես փոխվեցին, հայ ազգի ցավը նունպես իրենց համար զգալի է: Պետական մակարդակով մարդիկ Ծիծեռնակաբերդ բարձրացան, բայց լինել Ծիծեռնակաբերդում դա բոլորովին չի նշանակում ընդունել Ցեղասպանությունը»:

Թե դրանից հետո հայ-թուրքական հարաբերություններն ի՞նչ հարթություն կտեղափոխվեն,  կանխատեսելը դեռ վաղ է: Սակայն մի բան է պարզ, որ մեր դիվանագիտական կորպուսը պետք է ամեն ինչ անի, որպեսզի Թուրքիան չկարողանա ոչ մի կերպ  մեր ցավն արտահայտող իրադարձությունը ներկայացնի ի շահ իրեն, եզրափակեց տարածաշրջանային փորձագետը:

Ցուցադրել ավելի
Back to top button