Հասարակություն

«Շրջանառության հարկի» փոփոխություններից դժգոհող առեւտրականների խնդրով զբաղվում է ՄԻՊ- ը

Շրջանառության հարկի մասին» օրենքի նոր փոփոխությունից դժգոհ առեւտրականներն այսօր հանդիրել են Մարդու իրավունքների պաշտպանի սոցիալ-տնտեսական հարցերով տեղակալ Տաթևիկ Խաչատրյանին եւ դիմում-բողոք ներկայացրել Պաշտպանին։

Չնայած փոփոխության արդյունքում հարկի նվազեցմանը` առևտրականները բողոքում են, որ գույքի փաստաթղթավորման պահանջը իրատեսական չէ այսօրվա շուկայի պայմաններում, քանի որ կարող է հանգեցնել կամ ապրանքների գնաճի, կամ բազմաթիվ փոքր ձեռնարկատերերի սնանկացման: Միաժամանակ՝ տարբեր ոլորտների առևտրականները հայտնում են, որ հարկի կիրառումը միատեսակ չի ազդի տարբեր ապրանքների շուկաների աշխատողների վրա` հաշվի առնելով յուրաքանչյուր ոլորտի առանձնահատկությունները, օրինակ` ոսկերչություն, հագուստ, շինանյութ, կենցաղային իրեր և այլն: Ուստի՝ անհրաժեշտ է մշակել բոլորի համար փոխզիջումային հարկման տարբերակ:

Պաշտպանի տեղակալը հայտնել է, որ խնդիրն Օմբուդսմենի ուշադրության կենտրոնում է, և ստիպված ենք միայն հիմա զբաղվել այս հարցով, քանի որ նախագիծը նախապես չի ներկայացվել Պաշտպանին կարծիքի` ի խախտումն նախագահի 2007թ. թիվ 174-Ն հրամանագրի, համաձայն որի` «Մարդու իրավունքներին և ազատություններին վերաբերող օրենքների նախագծերը նախքան կառավարություն ներկայացնելը՝ ուղարկվում են Հայաստանի Հանրապետության մարդու իրավունքների պաշտպանին` կարծիքի»:

Տաթևիկ Խաչատրյանն առևտրականներին հայտնել է. «Այժմ Պաշտպանի հանձնարարությամբ հրատապ քայլեր են ձեռնարկվում բոլոր կողմերի փոխըմբռնման միջոցով խնդրին լուծումներ գտնելու նպատակով: Այս ուղղությամբ կշարունակենք աշխատանքը ձեզ հետ, իսկ առաջիկա օրերին կներկայացնենք մեր դիրքորոշումը և առաջարկները»:

Ցուցադրել ավելի
Back to top button