ՄշակույթՏեսանյութ

Հինգերորդ դասարանցիներն այս տարի ութ ծիսական պար և երգ կսովորեն

Աիդա Ավետիսյան
«Ռադիոլուր»

ՀՀ կրթության և գիտության նախարար Արմեն Աշոտյանի հրամանով նոր ուսումնական տարվանից  հանրակրթական դպրոցների 5-րդ դասարանցիների   դասացուցակներում ավելացել է  նաև ազգային երգ ու պար   առարկան: Ծրագիրը փորձարկվում է մայրաքաղաքից  8, իսկ մարզերից 3 դպրոցներում: 2 դպրոց էլ ցանկություն են հայտնել  մասնակցել ծրագրին և այսօր արդեն ուսուցիչները վերապատրաստվում են:

Մեծ մարզադահլիճ, երաժշտության որակն ապահովող կենտրոն, տնօրենի բարյացկամ վերաբերմունք և վերապատրաստման դասընթացներին  մասնակցելու պատրաստակամ ուսուցիչներ: Սրանք այն չափորոշիչներն են, որոնց հիման վրա էլ ընտրվել են  13 դպրոցները՝ ազգային երգն ու պարը փորձնական դասավանդելու համար:  «Կարին» ազգագրական երգի ու պարի գեղարվեստական ղեկավար Գագիկ Գինոսյանի խոսքով՝ վերապատրաստման դասընթացներին իրենց պահանջով մասնակցում է  յուրաքանչյուր դպրոցից  առնվազն երեք ուսուցիչ:

Այս առարկան  երեխայի գիտակցությունը պետք է  չսահմանափակի միայն ազգայինով: Պետք է լսել և՛ ազգայինը,  և՛ համաշխարհայինը, ասում է Գագիկ Գինոսյանը և հավելում. այն պետք է դեպի համամարդկային արժեքներ գնալու կամուրջ դառնա:  Պատահական չէ, որ ծրագիրը կոչվում է ազգային երգ ու պար և սրա նպատակը հայ երեխային հայեցի դաստիարակելն է: Գագիկ Գինոսյանը  կարևորում  է  ծրագիրը՝ նշելով, որ սա Հայաստանը մշակութային  ոճերից պարերգային ժանրին վերադարձնելու քայլ է: Սխալ է համարում, որ Խորհրդային միության ժամանակաշրջանում տարանջատվել է  ազգային երգն ու պարը:   Դա էլ պարերը շեղել է  ազգային ուղղուց՝ մտցնելով  կովկասյան և բալետային շարժումներ: Ստալինի շնորհիվ վրացական պարը դարձավ ճանաչելի, ասում է «Կարին» ազգագրական երգի ու պարի գեղարվեստական ղեկավարը և ընդգծում. մենք էլ սկսեցինք այդ շարժումները կիրառել մեր ազգային պարերում: Արդյունքում  պարը դասականացվեց: Այն ինչ,  մենք ունենք դասական ազգային պար, որը լեռնեցու ոգեղենություն կրող մշակույթ է:

«Շատ լուրջ պարի մասնագետներ ասում են, որպես ներաշխարհ, որպես ոգեղենություն, որպես փիլիսոփայություն հայկական պարն անմրցելի է վրացական կովկասյան ցանկացած  պարարվեստից: Եվ սա միայն հայ մարդկանց կարծիքը չէ»:

Նույն կերպ էլ տարանջատվեց երգը և դասական ոկալը գրավեց հայկական երգեցողության տեղը: «Անուշ» օպերայից դրվագները երգում ենք դասական մոտիվներով, նշում է Գագիկ Գինոսայնը  և սխալ համարում  երգն ու պարն իրարից  տարանջատելու  մոտեցումը:

«Պահ եղավ, որ ես ասեցի, որ եթե միայն պարը դասավանդվի, ես հրաժարվում եմ այդ ծրագրից: Ինքս լինելով պարի մասնագետ՝ ես դեմ եմ, որ միայն պարով այս առարկան մտնի դպրոց»:

Առաջին տարին 5-րդ դասարանցիներին ուսուցանվելու է 8 ծիսական պար և երգ, որից 5-ը լինելու է պարերգային ժանրում:

«Մենք ենթադրենք սովորելու ենք «Թամզարա»  պարը, սովորելու ենք «Թամզարա»  երգը, հետո մենք մեր երգով զուգադրելու ենք մեր պարը»:

Առաջին կիսամյակում  առարկան շաբաթական դասավանդվելու է 1 ժամ, իսկ երկրորդից՝  2 դասաժամով: Մասնագետները կարծում են, որ այս ծրագրի համար հատկացված դասաժամերը քիչ են, սակայն բավարարվում են եղածով:

Ցուցադրել ավելի
Back to top button