ԿարևորՔաղաքական

Էդվարդ Նալբանդյան.Սրբավայրի հանդեպ այս զարհուրելի բարբարոսությունը ցույց է տալիս «Իսլամական պետության» վայրագ էությունը

Խստորեն դատապարտում ենք Հայոց Ցեղասպանության զոհերի հիշատակին նվիրված, Մեծ Եղեռնի բազմաթիվ նահատակների մասունքներն ամփոփոխ Դեյր էզ Զորի Սրբոց Նահատակաց հայկական եկեղեցու պայթեցումը ահաբեկիչների կողմից. այս մասին հայտարարել է ՀՀ ԱԳ նախարար Էդվարդ Նալբանդյանը` Դեյր էզ Զորի Սրբոց Նահատակաց հայկական եկեղեցու պայթեցման կապակցությամբ։

«Սրբավայրի հանդեպ այս զարհուրելի բարբարոսությունը կրկին ցույց է տալիս այսպես կոչված «Իսլամական պետություն» ահաբեկչական խմբավորման վայրագ էությունը:

Միջազգային հանրությունը պետք է անհապաղ կանգնեցնի, ամրատախիլ անի քաղաքակիրթ մարդկությանը սպառնացող այդ ժանտախտը, կտրի դրա սնուցման, ֆինանասնավորման, աջակցության, հովանավորման ուղիները»,-ասվում է հայտարարությունում:

Հիշեցնենք, որ նախօրեին «Իրաքի և Լևանտի իսլամական պետություն» ահաբեկչական խմբավորումը, ականապատել և պայթեցրել էր Դեյր էզ Զորի Սրբոց Նահատակաց հայկական եկեղեցին: Այդ մասին հաղորդել է արաբական Al Mayadeen հեռուստաընկերության կայքը: Այս եկեղեցի-հուշահամալիրում են ամփոփված Հայոց ցեղասպանության ընթացքում Դեյր էզ Զորի անապատներում զոհված բազմաթիվ հայերի մասունքները, իսկ ցեղասպանության թանգարանում Հայոց Մեծ եղեռնը հավաստող բազմաթիվ վավերագրեր կան։

Ցուցադրել ավելի
Back to top button