Հասարակություն

ԱԱՀ մասին օրենքը՝ ծուղակ.մեքենա ներկրողներն են պնդում

Լիանա Եղիազարյան
«Ռադիոլուր»

Մեքենա ներկրողների հանդեպ գործող օրենքներից ու հարկային մարմինների գործելակերպից են այսօր լրագրողների հետ հանդիպման ժամանակ դժգոհել Ավտոներկրողների միության նախագահ Տիգրան Հովհաննիսյանն ու քաղաքացի Կամո Մարությանը: Վերջինս 2008 եւ 2009 թվականներին 2 մեքենա է ներկրել, երկուսն էլ իրացրել 2009-ին: Իսկ արդեն 2011-ին հարկային մարմինների կողմից իրեն ուղղված գրություններից քաղաքացի Կամո Մարությանը տեղեկացել է, որ ինքը մեղադրվում է ապօրինի ձեռնարկատիրական գործունեության մեջ ու պարտավոր է 3 մլն դրամի հարկային պարտավորություն մարել: 

Քաղաքացի Կամո Մարությանը 2009-ին 2 մեքենայի առքուվաճառքի գործարքից հետո մինչ այժմ քաշքշուկի մեջ է: Տարաձայնությունները հարկային մարմինների հետ են, ինքն էլ իր խնդրով արդեն դատարան է հասել, վարչապետի միջամտությունը խնդրել: 2008-ին ու 2009-ին Մարությանը 2 մեքենա է ներկրել, երկուսն էլ վաճառել 2009-ին: «Ավելացված արժեքի մասին» ՀՀ օրենքի համապատասխան կետի համաձայն՝ Մարությանի երկրորդ գործարքն արդեն հանդիսանում է ԱԱՀ-ով հարկվող: Սակայն վերջինս իր գործարքի մասով ԱԱՀ հաշվարկներ ու տեղեկություններ չի ներկայացրել հարկային մարմիններին: Հարկային համապատասխան տեսչությունն էլ այս մասին հիշեցում-ծանուցում է ուղարկել Մարությանին: Հենց այստեղից են տարաձայնությունները սկսվել: Մարությանի փոխանցմամբ՝

«Ասում են՝ փնտրել են Կամո Մարությանին, չեն գտել, սակայն սրանից առաջ քննիչը 2011-ին ինձ կանչել հարցաքննել է»:

Հետո արդեն հարկային մարմինները Մարությանին ճանաչել են ապօրինի ձեռնարկատիրությամբ զբաղվող ու գրությամբ տեղեկացրել՝ սա հաստատվելու դեպքում նա 5 մլն դրամանոց մեքենայի առքուվաճառքի վերջնարդյունքում պարտավոր է որպես վերջնական հարկային պարտավորություն վճարել 3 մլն դրամ՝ ներառյալ ԱԱՀ, տույժեր-տուգանքներ, սոցվճարներ: «Այսպիսի օրենք երեւի երկնագնդի վրա չկա»,-բարկանում է քաղաքացին ու պնդում՝ ինքը ձեռք չի բերել, ներկրել է, պատշաճ ձեւով մաքսազերծել, հետո իրեն պատկանող մեքենան վաճառել: Բայց հարկային մարմիններն իր հետ խոսում են օրենքի անունից, ու հենց օրենքից իր դժգոհություններն էլ քաղաքացի Կամո Մարությանը ներկայացրել է հանրապետության վարչապետին: Հովիկ Աբրահամյանի պատասխանը դեռ չկա, բայց խոստացված է հանդիպում կազմակերպել: Իսկ մինչ այդ Մարությանը վրդովվում է՝ իրեն այս խնդիրներն անգամ հիվանդանոցնի դուռն են հասցրել:

«Ինչի համար՝ չգիտես: Մի բան արած լինես, կասես՝ հա: Ես դաստիարակված ազնիվ մարդ եմ, վաստակավոր մանկավարժի զավակ եմ: Ես փողոցն եմ անցումով անցնում: Ինձ էսօր ասում են՝ ապօրինի ձեռնարկատեր ես: Ինչ է՝ կոշիկ եմ արտադրում իմ նկուղում, թե ինչ: Մեքենան բերել եմ, ամբողջ աշխարհը տեսել է: Սահմանից սկսած՝ համակարգում երեւում է, որ մեքենա եմ բերել, ինչ ապօրինության մասին է խոսքը: Թե չէ օրենքի գիրքը դնում են դարակը, վաճառում եմ, հետո հանում են՝ հոպ, գիրքը ցույց են տալիս: Ծուղակ է սա: Ուրիշ ոչինչ»:

Ցուցադրել ավելի
Back to top button