Հասարակություն

Բամբակաշատի «Սուրբ Աստվածածին»-ը 100 տարեկան է

Սաթիկ Իսահակյան
«Ռադիոլուր»-Արմավիրի մարզ

Հայ առաքելական եկեղեցու տաղավար վերջին  խաչվերացի տոնից առաջ Արմավիրի մարզի Բամբակաշատ գյուղի  «Սուրբ Աստվածածին» եկեղեցում նշվեց հիմնադրման  100-ամյակը, որի կապակցությամբ մատուցվել է սուրբ պատարագ:  Տոնի կապակցությամբ գյուղի բարերարի միջոցներով բարեկարգվել է եկեղեցու բակը, տեղադրվել է 2 խաչքար, իսկ Բամբակաշատ գյուղի մուտքի մոտ կառուցվել քրիստոնյա հավատքի խորհրդանիշ երկաթյա մեծ  խաչ:

Արմավիրի մարզի Բամբակաշատ գյուղի «Սուրբ Աստվածածին» եկեղեցին 100 տարեկան է, մինչև օրերս դեռ հայտնի չէր եկեղեցու կառուցման տարեթիվն ու կառուցողը, սակայն տարիներ շարունակ այն ծառայել է քրիստոնյա ժողովրդին, իսկ անաստվածության տարիներին՝ խոնարհվել, որից հետո Հովնանյանների բարեգործությամբ կրկին իր դռները բացել հավատացյալ ժողովրդի առջև: Արդեն հայտնի է եկեղեցու կառուցման պատմությունը, որը հիմնվել է ավելի վաղ 14-րդ դարում  կառուցված փայտաշեն տանիքով մատուռի փլատակների վրա: Մոլլաբայազետցի երիտասարդ քահանա տեր Հովհաննեսի կատարած հանգանակությամբ վեր է խոյացել աստծո տունը:

Քահանայի ծոռնուհին Հասմիկ Սարգսյանը պատմում է, որ  պահպանված վավերագիր փաստաթղթերի հիման վրա  բացահայտվում է ապուպապի թողած հուշագրությունը և հրպարակային դարձնում: Խորհրդային կարգերի փլուզումից հետո  հացահատիկի պահեստ դարձած եկեղեցին կրկին նոր շունչ է ստանում: Տարիներ շարունակ  Բամբակաշատի աստծո տունը եղել է Արմավիրի թեմական կենտրոն, որտեղ ամեն կիրակի Արմավիր քաղաքի ու Բամբակաշատին հարակից գյուղերի բնակիչները մասնակցել են սուրբ պատարագին և իրենց աղոթքը հասանելի դարձրել տիրոջը: «Սուրբ Աստվածածին» եկեղեցու բակը 100-ամյա տարելիցի շեմին բարեկարգվել էր, տեղադրվել էր նոր ցանկապատ, փոխվել էր խորանի խաչը և մի շարք վերոգման աշխատանքներ իրականացվել: Բացի այդ  եկեղեցու բակում տեղադրվել էր 2 խաչքար, որից մեկը նվիրված է մեծ եղեռնի անմեղ զոհերի հիշատակին: Հեղինակը բամբակաշատցի տվերաբնակ բարերար Լևոն Սոլկարյանն է:

Խաչի փրկության և գերությունից ազատման ՝ խաչվերացի տոնին ընդառաջ Բամբակաշատ գյուղի մուտքի մոտ բարերարը կանգնեցրել է նաև երկաթյա  լուսավոր մեծ խաչ, որն ավելի շատ ընդունված է  օրթոդոքս՝ ուղղափառ եկեղեցիներ ունեցող  համայնքներում: Արմավիրի թեմի առաջնորդ, տեր Սիոն եպիսկոպոս Ադամյանը ուրախությամբ նշեց, որ այդ սովորույթը տեղ է գտել նաև մեզ մոտ:

Քրիստոնեության խորհրդանիշեր խաչն ու խաչքարերը տերունականա աղոթքից հետո  oծվեցին և օրհնվեցին սրբազան հոր ձեռքով:

Բամբակաշատ գյուղի բնակիչները հաճախ են լինում եկեղեցում և աղոթում: «Սուրբ Աստվածածնում» են կատարում իրենց մկրտությունը,  պսակադրությունն  ու մատաղը:

Բամբակաշատ գյուղի եկեղեցու 100-ամյակի կապակցությամբ  բարերար Լևոն Սոլկարյանը արժանացավ մի շարք պատվոգրերի, ինչպես նաև  ավագանու կողմից նրան շնորհվեց համայնքի պատվավոր քաղաքացի կոչումը:«Սուրբ Աստվածածին» եկեղեցու 100 ամյա հոբելյանի կապակցությամբ եկեղեցու բակում մատուցվեց մատաղ:

Ցուցադրել ավելի
Back to top button