Տնտեսական

Արմավիրի մարզում սկսվել է խաղողի բերքահավաքը

Սաթիկ Իսահակյան
«Ռադիոլուր»-Արմավիրի մարզ

Արմավիրի մարզում սկսվել է խաղողի բերքահավաքը: Նախորդ տարվա կարկտահարված այգիներն այս տարի որոշոկիորեն վերականգնվել են և լավ մշակության դեպքում բարձր բերք ապահովել: Արմավիրցի խաղողագործները, որոնք մշակում են տեխնիկական սորտեր,  բերքն իրացնում են գինու, կոնյակի, օղու վերամշակող ձեռնարկություններում, որտեղ արդեն խաղողով բեռնավորված մեքենաների հերթեր են գոյացել: 1կգ խաղողի  մթերման արժեքը 150 դրամ է:

Արմավիրի մարզի խաղողի այգիներում այգեկութ է, ամենուր կարելի է հանդիպել խաղողով բեռնված բեռնատարների, որոնց ուղղությունը խաղող մթերող վերամշակող ձեռնարկություններն են և գինու, կոնյակի, օղու գործարանների ընդունող մասնաճյուղերը:  Վաղ գարնանային ցրտահարությունից որոշակիորեն պահպանված խաղողի բերքը մասամբ է արդարացնում մշակողի հույսերը, քանի որ այս տարի  գյուղացիները ոռոգման ջրի խնդրի առջև էին կանգնել:  Նալբանդյան գյուղից  Վասիլ Խաչատրյանը նշեց, որ այն մասում, որտեղ իրենց հողն է խորքային հորեր չկան, ոռոգում են Արաքսի ջրով,  սակայն  արդեն 2 շաբաթից ավել ջուր չունեն:

7000քմ խաղողի այգին նախորդ տարում վնասվել էր  կարկտահարությունից:  Այս տարի այն  մասամբ վերականգնվել է:  Սովորաբար բարենպաստ տարում իր այգուց Վասիլ Խաչատրյանը  քաղում է 15-20 տոննա բերք, բայց այս տարի բերքատվությունը եռակի նվազել է,  բացի կարկտահարությունից այգետերը  դա պայմանավորում է նաև քիչ ոռոգմամբ  քանի որ պլանավորել էր ոռոգել 6 անգամ, փոխարենը  ջրել է 2 անգամ, որի պատճառով էլ նվազ քանակությամբ բերք է ստացել: Իր նախնական հաշվարկով 7000քմ –ից  կստանա   5-6 տոննա խաղող:

Ակնալիճ գյուղից Հակոբ Հարությունյանի ընտանիքը 5 հա-ի  վրա մշակում  է  խաղողի կանգուն տեսակը, այգին անցած   տարիներին շարունակ վնասվել էր բնական աղետից և անցած տարի ամբողջ այգուց 25 տոննա բերք էր ստացել: Հակոբ Հարությունյանը նշեց, որ այգու մշակության համար 3 մլն 100 հազար դրամ վարկ է վերցրել, որի վճարումը անցած տարվա կարկտահարության պատճառով մինչև 2016թվականը  սառեցվել էր: Այս տարի  այգիները վերականգնվել են և 5 հա-ից սպասվում է մոտ 100 տոննա բերք, այսինքն՝ մեկ հա-ի միջին բերքատվությունը 20 տոննա է:   Այգետիրոջ հավաստմամբ  այս տարի կարկուտից այգիները պաշտպանվել են Ակնալճում   նոր տեղադրված հակակարկտային 5 կայանի միջոցով:

Խաղողի այգիներում բերքահավաքը շարունակվում է, մթերման կետերում հերթ է, որը անհանգստություն է պատճառում նաև շրջակայքին: Երևանի կոնյակի գործարանի Արմավիրի մասնաճյուղին հարակից շենքերի բնակիչները դժգոհում են ոչ միայն աղմուկից, այլև խաղողով բեռնված մեքենաներից ասֆալտին  թափվող շիրայից, որը միջատների  համար  հարմար միջավայր է ստեղծել, իսկ գործարանի տնօրինությունը  փողոցի լվացումն  անտեսել է:

Խաղողի բերքահավքը արդեն հունի մեջ է, որ կշարունակվում մոտ մեկ ամիս:

Ցուցադրել ավելի
Back to top button