Հասարակություն

Չմոռանալ, լինել պահանջատեր եւ ազատվել զոհի բարդույթից. Հայոց ցեղասպանության թեման մատուցելու նրբությունները՝ ամառային դպրոցում

Լիլիթ Մուրադյան
«Ռադիոլուր»

Ինչպե՞ս դասավանդել Հայոց ցեղասպանության թեման, որպեսզի նոր սերունդը չմոռանա, պահանջատեր լինի ու միեւնույն ժամանակ, ազատվի զոհի բարդույթից: Այս եւ շատ այլ նրբություններին ծանոթացել են Հայաստանի, Լեռնային Ղարաբաղի եւ Սփյուռքի շուրջ երեք տասնյակ ուսուցիչներ՝ մասնակցելով Հայոց ցեղասպանության թանգարան-ինստիտուտում կազմակերպված երկօրյա ամառային դպրոցին:

Մարի Թութելյանը ԱՄՆ -ից Հայաստան է ժամանել ամառային դպրոցին մասնակցելու համար: Նա հայ գրականություն և հայոց պատմություն է դասավանդում Կալիֆորնիայի Հայ քույրերի վարժարանում: Ցեղասպանության թեման հիշատակվում է ոչ միայն ապրիլ ամսին: Գրեթե յուրաքանչյուր դասի ընթացքում անդրադառնում են այդ մեծ ողբերգությանը:

«Մշտապես կազմակերպում են միջոցառումներ, քայլարշավներ՝ ոգեկոչելով Ցեղասպանության զոհերի հիշատակը և բարձրաձայնելով հայոց պահանջատիրությունը»։
Նույն վարժարանի, բայց ավելի բարձր դասարանի աշակերտներին հայոց լեզու, գրականության եւ հայոց պատմնությանյ դաբավանդող Մարո Քույումջյանի խոսքով ՝ հնարավորության դեպքում կրկին կգան ու կմասնակցեն վերապատրաստման դասընթացներին:

Զրուցեցինք նաեւ Կալիֆորնիայի համալսարանի գիտաշխատող, հայոց լեզվի և գրականության դոկտոր Ռուբինա Փիրումյանի հետ, ով, ի դեպ, ամառային դպրոցի մասնակիցների համար դասախոսություն է կարդացել: Նրա խոսքով՝ եթե մեր ուսուցիչները լավ պատրաստված են լեզվի, գրականության եւ պատմության առարկաներից, ապա Հայոց ցեղասպանության բնագավառը միշտ թերի է եղել:

«Պետք է աշակերտներից փոքրուց ծանոթացնել այդ դժվարին շրջանի՝ Ցեղասպանության հետ»:

Ավելի քան 10 տարի այս բնագավառում աշխատած մասնագետն ասում է, որ ինքն առաջնորդվում է հրեաների Հոլոքոստի դասավանդման պրակտիկայով:
Գյումրիի պետական մանկավարժական ինստիտուտի դասախոս Լիլիթ Ասոյանը, ով ավելի քան 10 տարի դասավանդում է «Հայկական հարցը եւ հայոց ցեղասպանության պատմություն» առարկան եւ հեղինակ է համանուն մեթոդական ձեռնարկի, նույնպես մասնակցում էր այս դպրոցին: Միջացառումը, նրա համար ունի ինչպես գործնական, այնպես էլ բարոյահոգեբանական նշանակություն, քանի որ նա նույնպես եղեռնը վերապրած սերնդի ներկայացուցիչ է:

«Մի ամբողջ սերունդ պետք է կրթել: Պետք է ոչ միայն ավելանան Ծիծեռնակաբերդի հուշահամալիրի ծաղիկները, այլեւ ջահերով երթի մասնակիցների թիվը»:

Հայոց ցեղասպանության թանգարան-ինստիտուտի փոխտնօրեն Սուրեն Մանուկյանն ասաց, որ թանգարան-ինստիտուտը կարևորում է դպրոցներում Հայոց ցեղասպանության թեմայի ճիշտ դասավանդումն ու մատուցումը:«Հայոց ցեղասպանության մատուցումը սպանվածի, կոտորվածի հոգեբանության շարադրելն ու տարածելը չէ։ Հակառակը՝ ավելի պատասխանատու, գրագետ ու հպարտ սերնդի դաստիարակումն է։ Մենք պետք է հասկանանք, որ Ցեղասպանության հիմնական նպատակը հայ ազգի ոչնչացումն էր։ Եվ մեր ազգը, լինելով ուժեղ, տոկուն, պայքարող, կարողացավ վերապրել Ցեղասպանությունը, ստեղծել պետականություն»,- ասաց Սուրեն Մանուկյանը։

Հավելենք, որ դասընթացին մասնակցել է 28 ուսուցիչ։ Ծրագիրը շարունակական կլինի, հետագայում ավելի մեծ ընդգրկում կունենա, խոստացավ Հայոց ցեղասպանության թանգարան-ինստիտուտի փոխտնօրենը:

Ցուցադրել ավելի
Back to top button