Հասարակություն

Աշխատանքի տոնավաճառ՝ Արմավիրում

Սաթիկ Իսահակյան
«Ռադիոլուր»- Արմավիր

Աշխատաբնքի և սոցիալական հարցերի  նախարարության զբաղվածության պետական ծառայություն գործակալությունն այսօր Արմավիրի մարզկենտրոնում առաջին անգամ կազմակերպել էր աշխատանքի տոնավաճառ, որին մասնակցում էր շուրջ 25 գործատու յուրաքանչյուր 1-2 թափուր աշխատատեղով հիմնականում սպասարկման և առևտրի ոլորտներում: Տոնավաճառը նպատակ ուներ ազատ  ընտրության հնարավորություն ընձեռել և գործատուին և գործզուրկին:

Աշխատանքի և սոցիալական հարցերի նախարարության զբաղվածության պետական ծառայությունն արդեն 8-րդ աշխատանքի շուկան է կազմակերպում հանրապետությունում՝ փորձելով որոշակիորեն օգնել աշխատանք փնտրողներին: Արմավիրում աշխատանքի տոնավաճառն առաջին անգամ էր կազմակերպվում: Մարզի աշխատանք փնտրողները շուկայում անկաշկանդ  ընտրություն են կատարում համապատասխան մասնագիտական աշխատանք գտնելու  համար, սակայն  մասնակից գործատուները հիմնականում  սպասարկման ոլորտ էին ներկայացնում և մեծամասամբ հացթուխի, վարորդի, վաճառողի պահանջարիկ ունեն:

Գործատուների թվում էր  նաև  Սարդարապատի պատմության և ազգային ազգագրության թանգարանը, որտեղ աշխատանքի 2 թափուր հաստիք կա` բանվորի և ցուցանմուշների պահպանողի:

Զբաղվածության ծառայության  Արմավիրի տարածքային գործակալության տնօրեն Վարազդատ Ասատրյանի տեղեկացմամբ՝ իրենց գործազուրկներից չորսն արդեն աշխատում  է  Սարդարապատի հուշահամալիրում: Արմավիրի մարզպետ Աշոտ Ղահրամանյանը հետաքրքրվեց աշխատավարձի չափով. բարձրագույն կրթությամբ աշխատողներինը 100-120 հազար դրամ է:

Աշխատանք փնտրողներից մեկը թանգարանում թեպետ ցածր աշխատավարձով, բայց  իր ամուսնու համար  բանվորի աշխատանք գտավ: «Մերձափնյա» ՋՕԸ-ում լավագույն աշխատավարձով աշխատանքը  հաշվապահի  հաստիքն էր, ընկերությունն ունի նաև  ջրբաշխի անհրաժեշտություն: Առաջարկվող աշխատանքների միջին աշխատավարձը 50-80 հազ. դրամ է: «Լիլի» ՍՊԸ-ի տնօրենը ներկայացրել էր դեղագետի և դեղագործի պահանջարկ և գտավ իր աշխատողին, որի աշխատանքային փորաշրջանի համար վճարներ կատարվելու է զբաղվածության ծրագրով նախատեսված գումարներից:

Աշխատանք փնտրողները գործատուի առաջարկած տարբերակին համաձայնվելուց հետո հատուկ նախատեսված արկղում թողնում էին իրենց տվյալները, որից հետո գործատուն ընտրելու է իր աշխատողին:

Զբաղվածության ծառայության Արմավիրի տարածքային կենտրոնի տնօրենը նշեց, որ իրենք հաճախ են համագործակցում գործատուների հետ՝  պարզելու թափուր աշխատատեղերը: Տարածքային կենտրոնի  տնօրեն Վարազդատ Ասատրյանը նշեց, որ 20 տոկոս աշխատանքի ապահովվածության դեպքում էլ իրենց ծրագիրը արդյունավետ կհամարվի:

Աշխատանքի և սոցիալական հարցերի նախարարության աշխատակից Անահիտ Թամզյանը փաստեց, որ տոնավաճառից հետո իրենք վերլուծություններ են կատարում և  3 ամսվա կտրվածքով պարզում իրական պատկերը, քանի աշխատանք փնտրող գործ գտավ:

Ցուցադրել ավելի
Կարդացեք նաև
Close
Back to top button