Սաթիկ Իսահակյան
«Ռադիոլուր»
Արագածոտնի մարզի Արտենի համայնքը տուժել է հունիսի 25-ի երեկոյան հողմամրրկից և կարկուտից: Հորդառատ անձրևը ուժեղ քամիների ուղեկցությամբ վնասել է համայնքի գյուղատնտեսությունը, առանձնատներն ու անասնագոմերը: Բնական աղետից տուժած գյուղացիները կառավարության ուշադրությունն իրենց վրա հրավիրելու պահանջով այսօր առավոտյան մոտ 2 ժամ փակել էին Արմավիր-Իսահակյան- Գյումրի հանրապետական նշանակության ճանապարհի Արտենիի հատվածը: Համայնքում է եղել Արագածոտնի մարզպետ Սարգիս Սահակյանը, հորդորել գյուղացիներին բացել ճանապարհը՝ խոստանալով խնդրին լուծում տալ:
Երեկ երեկոյան ժամը 19։ 20-ի սահմաններում շուրջ կես ժամ տևողությամբ սևծովյան հոսանքները, որոնք ուղեկցվել են մրրկահողմով, կարկուտով ու հորդառատ անձրևներով, զգալի վնաս են հասցրել Արագածոտնի մարզի Արտենի համայնքին: Արտենիում զգալի տարածքներ են կազմում ծիրանի այգիները, որոնք այս տարի առատ բերք ունեն:
Սովորաբար նախալեռնային գոտում ծիրանն ավելի ուշ է հասնում և այս համայնքում բերքահավաքը սկսվում է Արմավիրի մարզից հետո: Բերքառատ այգիներում երեկվա կարկուտը վնասել է ծիրանն ու կորցրել ապրանքային տեսքը: Վնասվել են նաև ձմերուկի բոստանները, հացահատիկի ցանքատարածքները:
Կառավարության ուշադրությունն իրենց խնդիրներին սևեռելու նպատակով այսօր առավոտյան Արտենի համայնքի գյուղացիները փակել էին ն Արմավիր-Իսահակյան-Գյումրի հանրապետական նշանակության և Արտենի- Արեգ-Թալին մարզային նշանակության ճանապարհների Արտենիի հատվածները:
Ճանապարհը բացելու նպատակով Արտենիում էր Արագածոտնի մարզպետ Սարգիս Սահակյանը: Նա տեղակացրեց, որ բնական աղետի մասին հաղորդել է ՀՀ նախագահին ու վարչապետին, կազմելու են մասնագիտական հանձնաժողովներ, ուսումնասիրելու են վնասի չափերը և զեկուցելու են արդյունքների մասին, ըստ որի էլ կմտածեն գյուղացիներին աջակցելու հնարավորությունների մասին:
Արտենիի գյուղատնտեսությունն արդեն 3-րդ տարին տուժում է կարկուտից, ինչն արդեն ենթադրում է, որ գյուղում զդացվում է հակակարկտային կայանների տեղադրման անհրաժեշտություն: Գյուղում կա մեկ հակակարկտային կայան, որը սեփականատերը տեղադրել է 2 ամիս առաջ, սակայն կարկուտի ընթացքում կայանը խափանվել է: Արագածոտնի մարզում այս տարի տեղադրվել է հակակարկտային 12 կայան, որոնց թիվն հասել է 40-ի: Մարզպետ Սարգիս Սահակյանը տեղեկացրեց, որ Արտենի և Արագածավան գյուղերում ծրագրով նախատեսված է հակակարկտային կայանների տեղադրումը:
Հայկ Սահարյանը արդեն 3-րդ շրջանն է, ինչ ընտրվել է ավագանու անդամ և քաջատեղյակ է գյուղացու հոգսերին, սակայն պետական այրերից որևէ մեկը իրենց մատից փուշ չի հանել:
Գյուղացիները մեծ վարկեր են վերցրել բանկերից, ինչպես նաև կանխավճարով պայմանավորվածություններ ձեռք բերել ծիրան արտահանողների հետ, որպեսզի կարողանային այգիները լավ մշակել, սակայն այժմ փաստի առջև են կանգնել: Արտենցիները իրենց խնդիրների լուծման հույսը այժմ կապում են վարչապետի հետ և հավատում օժանդակությանը:
Արտենիում կարկուտից ու հեղեղից վնասվել 1300 հա մշակովի հողատարածք, որից 250 հա-ը ծիրանի այգիներ են, մնացածը սալորի, խնձորի այգիներ, բոստանային ու հացահատիկային մշակաբույսերի ցանքատարածքներ: Վնասի չափերը ճշտելու նպատակով Արագածոտնի մարզի գլխավոր գյուղատնտես Յուրի Ազատյանի գլխավորությամբ կազմվել է մասնագիտական հանձնաժողով, որն արդեն համայնքում անցել է գործի: Մասնագիտական հանձնաժողովի ստուգման նախնական արդյունքները պարզ կլինի 3 օր հետո:
Ժամը 14-ի դրությամբ ճանապարհն արդեն բաց էր:
