Հասարակություն

Հայ ժողովուրդը ավելի մեծ հարգանք է ցուցաբերել Անաստաս Միկոյանի հանդեպ, քան նա արժանի էր

Ալիսա Գեւորգյան
«Ռադիոլուր»

«Ուրիշ դարդ ու ցավ չունի ժողովուրդը, ի՞նչ կարիք կար քրքրել մարդու հիշատակը, մանավանդ, եթե նրա անունով արդեն հինգ հուշարձան կա Հայաստանում՝ փողոցներ, դպրոցներ, տուն-թանգարան: Ի՞նչ կարիք կա դնել Միկոյանի 6-րդ հուշարձանը, այն էլ՝ Երևանում»,- խորհրդային գործիչ Անաստաս Միկոյանի արձանի շուրջ ստեղծված կրքերին այսօր արձագանքել է նաև գրող, հրապարակախոս Մերուժան Տեր-Գուլանյանը։

«Նա պետական- քաղաքական մեծ գուրծիչ էր խորհրդային շրջանի ու խորհրդային պետության համար, իսկ հայ ժողովրդի հետ կապ ունի այնքանով, որ ծագումով հայ է: Գուցե ավելի տրամաբանական է, որ Անաստաս Միկոյանի արձանը դրվի Մոսկվայում, այլ ոչ թե Երևանում, որովհետև նա ավելի շատ ծառայել է Ռուսաստանին», հրապարակախոս, գրող Մերուժան Տեր- Գուլանյանը համոզված է՝ հայ ժողովուրդը միշտ ավելի մեծ հարգանք է ցուցաբերել Անաստաս Միկոյանի հանդեպ, քան նա արժանի էր:

Ըստ մտավորականի՝ իհարկե մտահոգիչ է, որ Հայաստանի անկախության երկրորդ տասնամյամում մայրաքաղաքի ընտրանին կողմ է քվեարկում խորհրդային գործչին պատվանդան բարձրացնելու որոշմանը: Գործիչ, որի անվան հետ են նաև կապված հարյուր հազարավոր անմեղ մարդկանց սպանությունները: Մերուժան Տեր-Գուլանյանը պատկանում է այն մարդկանց թվին , որոնք նման արձանների մեջ վտանգ են տեսնում, խորհրդային բարքերի, հոգեբանության վերադարձի վտանգ։

«Հայ մտավորականությունն այսօր պիտի վախենա և զգուշանա սովետիզացումից»,- ասում է Տեր- Գուլանյանը: Նա այսօր անդրադարձավ նաև Աստանայի հայտնի միջադեպին: «Եթե Նազարբաևի ներկայացրած նամակից հետո Հայաստանի նախագահը լռել է, ուրեմն մտածել է հաջորդ քայլի մասին, նրան շփոթեցնելը դժվար է»,- ասում է մտավորականը, ում ձևակերպմամբ նախագահին քննադատելն այսօր ավելի հեշտ է, քան՝ պաշտպանելը։ «Պաշտպանելու կարիք չկա, բայց պետք թիկունք լինել նրան»,- ասում է։

 

Back to top button