Սաթիկ Իսահակյան
«Ռադիոլուր»- Արմավիրի մարզ
Ախուրյանի ջրամբարում ջրի մակարդակը զգալիորեն նվազել է, ինչն էլ խուճապ է առաջացրել գյուղացիների շրջանում, եթե հիմա բանջարեղենի մշակությամբ զբաղվեն, արդյոք կստանան այն եկամուտն, ինչն ակնկալում են: Ներկայում ոռոգման ջրի պակաս չի զգացվում, դա պայմանավորված է նաև վերջին օրերի առատ տեղումներով, սակայն ամռանը պատկերը փոխվում է, առուները ցամաքում են, լինելու դեպքում էլ գյուղացիների միջև է կռիվ ծագում:
Տարիների փորձը ցույց է տվել, որ ամռան կեսին կամ հողի մշակների խոսքերով «պիկ շրջանում» զրկվում են ոռոգման ջրից: Քարակերտում պտղատու այգիների ցրտահարության պատճառով գյուղացիների մի մասը օգտվել է հատկացված սերմերից և բոստան է դրել, սակայն վստահ չեն որ կկարողանան ոռոգումը ժամանակին կազմակերպել: Մանվել Բաղդոյանը համոզված է դրանում, թեև վնասված այգիների տակ բոստանային մշակաբույսերի սերմեր է ցանել:
Քարակերտի մշակովի հողերը ոռոգվում են Ախուրյանի ջրամբարից «Շենիկ» ջուր օգատագործողների ընկերության միջոցով, համակարգը մասամբ քայաքայված է, հողային հունով ոռոգման պատճառով էլ կորուստները շատ են: Միքայել Ալեքսանյանը 6 հա ծիրանի այգին ոռոգելու և կորուստներից խուսափելու նպատակով գտել է լուծումը, մայր ջրանցքից 2 կմ մետաղյա փակ խողովակաշար է անցկացրել մինչև իր այգին:
Ցրտահարված այգիների վնասի դիմաց գյուղնախարարությունը այգետերերին հատկացրել է բանջարեղենի սերմեր: Քարակերտի գյուղապետ Մհեր Հարթենյանը տեղեկացրեց, որ սերմերը հատկացվել են ըստ մշակության տարածքների շուրջ 32 հա մշակելու նպատակով:
Այգետերերի մի մասը վարձակալել են համագյուղացիների չմշակված հողերը պայմանով, որ աշնանը այդ հողը ցորենով ցանված վերադարձնեն տիրոջը:
Ցրտահարության և ոռոգման ջրի սակավության պատճառով շատերը արտագնա աշխաըանքի են մեկնել : Ջրի սակավությունը գյուղացիները պայմանավորում են նաև թուրքական կողմից մի քանի ջրամբարների գոյությամբ, որոնք ջրի մեծ պաշարում են կուտակում:
Ջրային տնտեսության պետական կոմիտեկ ջրային տնտեսության ծրագրերի իրականացման գրասենյակի տնօրեն Ադիբեկ Ղազարյանը հաստատեց, որ Թուրքիայում Արաքս գետի վրա մի քանի ջրամբարներ են կառուցվել, իսկ որպես ադեկվատ քայլ Հայաստանում նախատեսվել է կառուցել 4 ջրամվբար` Կապսի, Վեդու, Եղվարդի և Մաստարա սելավատարի : Մաստարա հեղեղատարը սկիզբ է առնում Արագածի լանջերից հիմնականում լցվում է անձրևաջրերով և Ախուրյանի ջրամբարից բաց թողնված ջրերով:
Ջրամբարների կառուցումն առջևում է, իսկ հիմա ոռոգման ջուրը քարակերտցիներին ժամանակացույցով է մատակարարվում, որպեսզի ամռանը կարողանան որոշակիորեն բավարարեն ջրի պահանջարկը:
