Հասարակություն

ԲարՔեմփ Երևան 2014»- ի խորհրդանիշը «Զվարթնոցի» հին շենքն է

Արտակ Բարսեղյան
«Ռադիոլուր»

Մայիսի 31-ին Երևանի Ամերիկյան համալսարանում կմեկնարկի  երկօրյա «ԲարՔեմփ Երևան 2014» ոչ պաշտոնական կոնֆերանսը, որին կմասնակցեն շուրջ 1500  ծրագրավորողներ, տեղեկատվական տեխնոլոգիաների մասնագետներ, ճարտարագետներ, բլոգերներ, օն-լայն լրագրողներ և սոցիալական ցանցերի ակտիվիստներ: Ամենամյա այս միջոցառման մասնակիցներն արդեն 6-րդ  անգամ կքննարկեն համացանցային արդի տեխնոլոգիաները, ծրագրավորման կիրառական խնդիրները, ճարտարագիտական նորարական լուծումներն ու  սոցիալական մեդիայի վերջին զարգացումները տարածաշրջանում և աշխարհում:

Այս տարվա  երևանյան  «ԲարՔեմփի» գլխավոր առանձնահատկությունը խորհրդանիշն է՝ «Զվարթնոց» օդանավակայանի այլևս հին մասնաշենքի պատկերը՝ կատարված առաջին սերնդի համակարգչային տեխնոլոգիաների ոճով։

Տարեց տարի ավելանում է այս միջոցառման մասնակիցների թիվը, ինչը վկայում է ոլորտի պահանջարկի շարունակական աճի մասին: Գրանցումը կատարվում է հավաքի կայքում՝ barcamp.am հասցեով: Այսօր առավոտյան արդեն գրանցված էր 1200 մարդ, հայտնեց «ԲարՔեմփի» կազմակերպիչներից Հարութ Մարտիրոսյանը։

Ինչպես և նախորդ տարիներին, գալիք «ԲարՔեմփին» ևս կմասնակցեն ՏՏ ոլորտի առաջատար օտարերկրյա և տեղացի մասնագետներ, որոնք կներկայացնեն առկա զարգացումները և նվաճումները: Ի դեպ՝ նախորդ տարիներին հավաքին մասնակցել և ելույթ են ունեցել վարչապետը և մեր երկրում ԱՄՆ արտակարգ և լիազոր դեսպանը։

Այս անգամ մասնակիցների ելույթները և ներկայացումները զուգահեռաբար կընթանան 5 լսարաններում: «ԲարՔեմփի» ընթացքին հնարավոր կլինի հետևել նաև համացանցում՝ ուղիղ հեռարձակմամբ։

 

Back to top button