Սաթիկ Իսահակյան
«Ռադիոլուր»-Արմավիրի մարզ
Այսօր Արմավիրի մարզի Ջանֆիդա գյուղում բացվեցին նորակառույց եկեղեցու դռները, որը օծվեց և անվանակոչվեց սուրբ Կարապետի անվամբ : Եկեղեցին կառուցվել է ռուսաստամանբնակ ջանֆիդացի բարերար Արթուր Կարապետյան հովանավորությամբ: Սուրբ Կարապետ եկեղեցու բացմանը ներկա էին Աժ պատգամավորներ, ինչպես նաև ռուսաստանցի հյուրեր:
Արմավիրի մարզի սահմանամերձ Ջանֆիդա գյուղում այսուհետ շաբաթը մեկ անգամ կղողանջեն սուրբ Կարապետ եկեղեցու ղողանջները, որոնք կլռեցնեն նաև թուրքերի նամազի ձայները: Հոգևոր տան կառուցումը անհրաժեշտություն էր դարձել ջանֆիդացիների համար: Քրիստոնեական ծիսակատարություններին մասնակցելու, ինչպես նաև հարսանեկան պսակադրություններ կազմակերպելու նպատակով ջանֆիդացիները գնում էին հարակից գյուղերի եկեղեցիներ կամ էլ հաճախում էին Մայր տաճար: Ջանֆիդայի բնակիչ Բաբկեն Գրիգորյանը հավատավոր քիրստոնյա է, ով հաճախ է լինում եկեղեցում: Նա կոմունիստի անդամատոմսով համայնավարության տարիներին իր պսակադրությունը հաստատել է եկեղեցում` ԶԱԳՍ-ում գրանցվելու փոխարեն:
Ջանֆիդա գյուղում եկեղեցի կառուցելու մտահղացումը Կարապետյան եղբայրներից կրտսերինն է` Արթուր Կարապետյանին, ով իրականացրել է նաև իր ծնողների ու նախնիների երազանքը: Բարերարը եկեղեցին կառուցել է իր ծնողների հիշատակին և ցանկացել է կոչվի իր Կարապետ պապի անվամբ:
Արթուր Կարապետյանն արդեն 20 տարի ապրում է Դոնի Ռոստովում: Նորակառույց եկեղեցու բակում նա և իր հարազատ բարեկամները տեղադրել են 7 խաչքար, որոնք խորհրդանշում են միասնություն, հավատք, հայ-ռուս բարեկամություն, եղեռնը և այլն:
Հայ առաքելական եկեղեցու Արմավիրի թեմը հոգևոր հողիվ տեր Սիոն եպիսկոպոս Ադամյանի ձեռամբ բացվեցին նորակառույց եկեղեցու դռները, օծվեցին սյուները, խորանը և Աստծո հոգևոր տունը անվանակոչվեց սուրբ Կարապետ:
Ջանֆիդա գյուղում եկեղեցի կառուցելու և քրիստոնյա հավատքը ամուր պահելու նպատակով բարերար Արթուր Կարապետյանը արժանացավ Արմավիրի մարզպետ Աշոտ Ղահրամանյանի պատվոգրին, Ջանֆիդա համայնքի պատվավոր քաղաքացու կոչմանը, որի կապակցությանբ նրան նվիրաբերվեց մեկ չափաբաժին հողակտոր: Իսկ Արթուր Կարապետյանը Արմավիրի թեմի առաջնորդին հանձնեց եկեղեցու կառուցման վկայականը, որպես Մայր Աթոռի սեփականություն:
Արմավիր մարզի ջանֆիդա գյուղում քիչ չեն քրիստոնեական դավանաբանությամբ տարբեր կրոնական կազմակերպությունների հետևորդները, տեղացիների հավաստմամբ դրանք բնակչության մի մասն են կազմում, շուրջ 30 տոկոսը:
Համագյուղացիների կարծիքով եկեղեցու առկայությունը թերևս ետդարձի ճանապարհ չի լինի աղանդավորների համար, սակայն կարող է կանխել նրանց շարքերի համալրումը:
Ջանֆիդայի եկեղեցու բացման կապակցությամբ մեծ համերգ էր կազմակերպվել բակում, Հայրենական մեծ պատերազմում զոհվածների հուշարձանի հարևանությամբ, որին մասնակցում էր Հանրային ռադիոյի «Արևիկ» մանկական համույթը:
