Աննա Նազարյան
«Ռադիոլուր»
Մայիսի 8- ին Մոսկվայում կայացած Ռուսաստանի, Բելառուսի, Ղրղզստանի ու Տաջիկստանի ղեկավարների հանդիպումը Արևմուտքի, ԱՄՆ- ի վրա հոգեբանական ազդեցություն թողնելու նպատակ ուներ, դա միասնության ցուցադրում էր, «Ռադիոլուրի» հետ զրույցում վերլուծելով Մոսկվայում երեկ կայացած հանդիպումը, ասել է քաղաքագետ Երվան Բոզոյանը։
Ինչ նպատակ էր հետապնդում Մոսկվայում կայացած Հայաստանի, Ռուսաստանի, Բելառուսի, Ղրղզստանի ու Տաջիկստանի ղեկավարների հանդիպումը, որի ընթացքում Սերժ Սարգսյանը հիմնականում շեշտադրեց սեպտեմբերի 3-ին Մոսկվայում ձեռք բերված պայմանավորվածոււթյունների կատարման հարցը, ինչպես նաև ՀԱՊԿ անդամ պետությունների արագ արձագանքման համատեղ ուժերի անդամ պետություններին ժամանակակից սպառազինություններով ու տեխնիկայով զինելու գործընթացի արագացման թեման:
Ուկրաինական զարգացումների ֆոնին Բելառուսի նախագահ Ալեքսանդր Լուկաշենկոն էլ կոչ արեց համատեղել ջանքերը Արևմուտքի պատժամիջոցներին միասին դիմակայելու համար: Ռուսաստանի նախագահ Վլադիմիր Պուտինն էլ նշեց, որ Եվրոպայում կրկին գլուխ է բարձրացնում մարտնչող ազգայնականությունը, և որ նման անպատասխանատու քաղաքականությունը ողբերգության է հանգեցնում:
Զրուցակիցս՝ քաղաքագետ Երվանդ Բոզոյանը նշում է, որ Ռուսաստանը հափշտապ քայլեր է ձեռնարկում, արհեստականորեն արագացնում է Եվրասիական միասնական տնտեսական տարածք ստեղծելու գործընթացը և այդ հարցում քաղաքագետին անհասկանալի է Հայաստանի շահը, երբ ամեն երկիր փորձում է ինչ- որ բան կորզել Ռուսաստանից։
Մինչև փաստաթղթի ստորագրումը մնացել է երեք շաբաթ ու թեև ռուսական փորձագիտական շրջանակները կասկածի տակ են առնում Եվրասիական միասնական տնտեսական տարածք ստեղծելու մասին փաստաթղթի ստորագրումը, սակայն Հայաստանում ավելի քան վստահ են, որ մայիսի վերջին կստորագրվի փաստաթուղթը։
