Սոնա Հակոբյան
«Ռադիոլուր»
Ապրիլի 9- ին 11:30- ին ֆինանսների նախարարության դիմաց կկայանա «Դեմ եմ» նախաձեռնության բողոքի ակցիան: Ակցիայի նպատակն է դնել հստակ պահանջներ և պահանջել ըստ ժամանակացույցի կատարել դրանք: Շարժման անդամները կարծում են, որ ստեղծվել է մի իրավիճակ, երբ խոցելի է ոչ միայն աշխատողը, այլև գործատուն: Երիտասարդներն այսօր լրագրողների հետ հանդիպման ժամանակ հայտարարել են, որ ներկայացնելու են սահմանադրորեն հիմնավորած պահանջներ և չեն հանձնվելու մինչև այդ պահանջների վերջնական բավարարումը: Նրանք նաև հայտնել են, որ վերջնաժամկետի առումով ևս առաջնորդվում են ՍԴ որոշման մեջ տեղ գտած այն պնդմամբ, որ մարդու իրավունքների պաշտպանությունը չի կարող ենթադասվել տեխնիկական ու կազմակերպչական տարաբնույթ հանգամանքներին:
«Դեմ եմ»- ը պատրաստվում է բողոքի հերթական ակցիային։ Այն տեղի է ունենալու ապրիլի 9-ին ֆինանսների նախարարության մոտ, այսօր լրագրողների հետ հանդիպման ժամանակ հայտարարեցին շարժման ակտիվիստները: Վերլուծելով ՍԴ որոշումից հետո առաջացած իրավիճակը՝ Դավիթ Դավթյանը նկատեց, որ այժմ խնդիրներ են առաջանում ինչպես գործատու-աշխատող, այնպես էլ գործատու պետական գերատոսչություն շփումներում։ «Աշխատակիցը ՍԴ որոշմամբ իրավունք է ստացել արտահայտելու իր կամքը` տնօրինելու իր իսկ սեփականությունը: Մյուս կողմից գործատուն օրենքի 76-րդ հոդվածի համաձայն ստիպված է ամեն դեպքում չվճարված գումարների համար տուգանքի ենթարկվել: Փաստորեն՝ գործատուն հայտնվել է շատ զգայուն վիճակում»,- ասում է։
Լավ գիտակցելով, որ ստեղծված իրավիճակն իր անմիջական ազդեցությունն է ունենալու նաև բիզնես միջավայրի վրա` «Դեմ եմ»- ի անդամները ապրիլի 9-ին ներկայացնելու են իրենց հստակ պահանջները ու պահանջելու են կատարել դրանք հստակ ժամանակացույցով: «Պահանջում ենք հաշվետվության ձևի ինքնաշխատ դաշտը կուտակային վճարների խմբագրելի դարձնել: Պահանջում ենք, որպեսզի գործատուն հնարավորություն ունենա զրոյացնելու այդ դաշտը»,- ներկայացրեց Վահան Դուրինյանը։
«Դեմ եմ»- ի երկրորդ պահանջն է անհապաղ ընդունել ակտ, որով կամուրջ հաշիվներին փոխանցված գումարները պետք է արագ հետ վերադարձվեն: Շարժման անդամները խնդրում են ՀՀ բոլոր քաղաքացիներին անտարբեր չլինել և միանալ պայքարին, քանի որ խնդիրն առնչվում է բոլորին։ «Կոչ եմ անում ՀՀ քաղաքացիներին չանտեսել այս գործընթացը, քանի որ սա վերաբերում է բոլորին: Եթե դուք չեք աշխատում այսօր, վաղը կաշխատեք, եթե դուք թոշակառու եք, ձեր երեխան է աշխատում, եթե ուսանող եք, վաղը կաշխատեք: Պետք չէ մտածել, որ ինչ- որ քանակի մարդիկ զբաղվում են այս հարցով, ուրեմն թող զբաղվեն: Խնդրում եմ բոլորին մասնակցել և միահամուռ ուժ ցույց տալ գերատեսչություններին»։
Ֆինանսների նախարարությունից ակցիայի մասնակիցները շարժվելու են դեպի Պետեկամուտների կոմիտե, սակայն եթե ֆինանսների նախարարությունը բավարարի երիտասարդների պահանջները, շարժման ակտիվիստները հավաստիացրեցին, որ չեն շարունակի բողոքի ակցիան։
