Լենա Բադեյան
«Ռադիոլուր»
Պարույր Հայրիկյանի քրեական գործով դատապարտյալ Վարդան Սեդրակյանի կնոջ եւ բարձրաստիճան զինվորական Ալեքսանդր Աբրահամյանի միջեւ տեղի ունեցած հեռախոսազրույցը մի քանի օր առաջ հայտնվեց համացանցում, այնուհետեւ անհետացավ: Բայց այդ ընթացքում Պարույր Հայրիկյանի փաստաբան Լեւոն Բաղդասարյանին հաջողվել է ձեռք բերել այդ ձայնագրության պատճենը: Հիմա դա հիմք դարձավ, որ թարմացվեն նախագահի նախկին թեկնածու Պարույր Հայրիկյանի դեմ կազմակերպված մահափորձի խոսակցությունները: Խնդիրն այն է, որ Ալեքսանդր Աբրահամյանը փորձում է Վարդան Սեդրակյանի ընտանիքից հետ ստանալ ինչ որ միլիոնավոր դոլարներ, քանի որ այդ գումարները միայն իրենը չեն:
Սեդրակյանի կինն իր հերթին պատասխանել է, որ խուզարկության ժամանակ իրենց տանից գումար չի հայտնաբերվել: ԱԻՄ առաջնորդի փաստաբանն այսօր հիշեցրեց, որ սույն քրեական գործի շրջանակներում դեռեւս դատաքննության փուլում Պարույր Հայրիկյանը միջնորդություն էր արել, որպեսզի հարցաքննեն հայր եւ որդի Աբրահամյաններին, որոնցից որդին` Էդուարդ Աբրահամյանը, քրեական գործում ցուցմունք է տվել, որ Սեդրակյանին տվել է 100 հազար ամերիկյան դոլար:
Պարոյր Հայրիկյանի փաստաբանն այս հարցերով այսօր դիմեց Ազգային Անվտանգության ծառայությանը եւ ՀՀ Գլխավոր դատախազին: Համարում է, որ լրատվամիջոցներով հայտարարությունը բավարար է ուշադրություն հրավիրելու համար:
Այս պահին հստակ փաստեր դեռեւս չկան, որ հեռախոսազրույցը եւ դրանում նշվող դոլարները կապ ունեն բացառապես Հայրիկյանի մահափորձի հետ:
Հիշեցնենք, որ այս քրեական գործով դատապարտյալ Վարդան Սեդրակյանն արդեն կրում է 14 տարվա ազատազրկման իր պատիժը:
