ԿարևորՔաղաքական

ԱԺ նախագահը կարգավորում է խորհրդարանական պատվիրակությունների ձեւավորման դաշտը. տուժում է «Ժառանգությունը»

Լուսինե Վասիլյան
«Ռադիոլուր»

Ավարտվող շաբաթվա ընթացքում օրենսդրական քննարկումներին զուգահեռ Ազգային ժողովում  քննարկվում էր նաև միջազգային կառույցներում Հայաստանը ներկայացնող խորհրդարանական պատվիրակությունների ձևավորման  նոր կարգը : ԱԺ նախագահ Հովիկ Աբրահամյանը  խմբակցությունների ղեկավարների հետ  երկու խորհրդակցությունից հետո  հրապարակեց  պատվիրակություններում խմբակցությունների միջև տեղերի բաշխման նոր կարգը: Այն,  ըստ էության, ԱԺ մոտ 1 տասնյակ   պատվիրակությունների կազմում մեծ փոփոխություններ չի արձանագրել: Բացառությունը ԵԽԽՎ պատվիրակությունն է: Այստեղ ներկայացուցիչ ունենալու իրավունքից զրկվել է «Ժառանգություն» խմբակցությունը, փոխարենը՝  այդ հնարավորությունը ստացել է ՕԵԿ-ը։

«Ժառանգություն» խմբակցության ղեկավար Զարուհի Փոստանջյանը  պատվիրակությունների  նոր կարգի հրապարակումից հետո  չուշացրեց արձագանքը.  կայացված   որոշումը ավտորիտար համարեց  և  խորհրդարանական մեծամասնությանը դժվարին օրեր խոստացավ։ «Պարոն Աբրահամյան, ուզում եմ Ձեզ տեղեկացնել, որ այս ավտորիտար որոշման դեմ լինելու է համապատսախան բողոքարկում:  Ձեզ դժվարին օրեր են սպասվում, այս որոշումը չի ներվելու»,- սպառնաց Փոստանջյանը։

Իսկ արդեն քառօրյան ամփոփող ճեպազրույցների ժամանակ մանրամասնեց, թե ինչ նկատի ուներ դժվարին օրեր խոստանալով: Խոսքը, ըստ «Ժառանգություն» խմբակցության ղեկավարի,  կայացված որոշումը ԵԽԽՎ-ում բողոքարկելու մասին է: Գործընթացը, դեռ ոչ պաշտոնապես, բայց արդեն սկսված է: «Իհարկե, կատարված քայլը ունենալու է իր հետևանքները: Պատվիրակության կազմը ԵԽԽՎ-ին պաշտոնապես ներկայացվելու է հունվարին, մինչ այդ ես ոչ պաշտոնական խողովակներով սկսել եմ բողոքարկման գործընթացը»,- ասաց։

Ի դեպ՝ համանման իրավիճակ «Ժառանգության» և Զարուհի Փոստանջյանի հետ եղել էր նաև 2010 թվականին: Այդ անգամ դժգոհության առիթը ընդդեմ Հայաստանի բանաձև ընդունելու Փոստանջյանի նախաձեռնությունն էր, որն ի կատար ածելու ճանպարհին նա դիմել և ստացել էր նաև ԵԽԽՎ-ում թուրք և ադրբեջանցի պատվիրակների ստորագրությունը: Հաջորդ նստաշրջանին, սակայն, ԵԽԽՎ-ի աջակցությամբ և ֆինանսավորմամբ, Փոստանջյանը դարձյալ Ստրասբուրգում էր։

Կարգի վերանայման արդյունքում՝ ԵԽԽՎ հայստանյան պատվիրակությունում 3 անդամի տեղ կունենա ՀՀԿ-ն, 2 տեղ  ԲՀԿ-ն, 1-ական  տեղ ՀԱԿ-ը, ՕԵԿ-ը և ՀՅԴ-ն։ Վերանայված կարգը պատվիրակության ղեկավար Դավիթ Հարությունյանն արդարացի է համարում։ «Իրականում՝ խնդիրը հետևյալն է՝ հնարվորինս հաշվի առնել ԱԺ քաղաքական ներկապնակը: Բայց կան պատվիրակություններ, որոնք ընդամնեը 3 անդամ ունեն, դրանցում, բնականաբար, բոլոր խմբակցությունները ներկայացուցիչ ունենալ չեն կարող: Այնպես որ՝ գերական ոչ թե սզկզբունքն է, որ յուրաքանչյուր խմբակցություն ներկայացված լինի, այլ որ ընդհանուր ներկայացվածությունը արդարացի լինի»:

Հանձնաժողովում ՀՅԴ-ն ներկայացնող Արմեն Ռուստամյանը վստահ է, որ Զարուհի Փոստանջյանի բողոքը կհասնի ԵԽԽՎ: Այդ բնույթի հարցերով Վեհաժողովում սովորաբար  զբաղվում է կանոնադրային հանձնախումբը, որի կազմում են Դավիթ Հարությունյանն ու Արմեն Ռուստամայանը: Հենց վերջինից էլ հետաքրքրվեցինք՝ ի՞նչ է կարծում, բողոքին ինչպես կարձագանքի հանձնախումը։ «Ֆորմալ առումով ես չեմ տեսնում այն հիմքերը, որոնցով  այստեղ ԵԽ-ն պահանջի վերանայել պատվիրակության կազմը»։

Հետաքրքվեցինք, թե ինչպես կարձագանքի հանձնաժողովը Փոստանջյանի բողոքի այն մասին, երբ տեղի ունեցածը որպես Ստրասբուրգում հնչեցրած հարցի հետևանք և կարծիք արտահայտելու համար հետապնդում ներկայացվի։ «Դա արդեն քաղաքական հարց է: Հանձնաժողովը դա չի քննարկելու, քննելու է պատվիրակության ձևավորման հարցը և այն, թե «Ժառանգության» չլինելն արդյո՞ք հակասում է ԵԽԽՎ կանոնադրությանը: Ֆորմալ առումով հիմքերը թույլ են»։

Ռուստամյանի անձնական կարծիքով՝ պատվիրակության աշխատանքը Փոստանջյանի բացակայությունից կտուժի:  Կա մի դաշտ,  որտեղ Փոստանջյանն անգերազանցելի էր և  նրա բացակայությունից այդ դաշտը տուժելու  է, ասում է Ռոսւտամյանը: «Դա այն դաշտն է, երբ մենք խնդիր ունենք տարբեր բանաձևեր ընդունելու, ստորագրահավաք իրականացնելու, օրինակ մեր երկրի համար կարևոր հարցերում: Այդ դաշտում Փոստանջյանն աշխատել է բոլորից լավ»։

Ցուցադրել ավելի
Back to top button