ԿարևորՔաղաքական

Պայքար պաշտոնյաների աշխատավարձի բարձրացման համար. ԱԺ քառօրյան ավարտվեց

Արտակ Բարսեղյան
«Ռադիոլուր»

Պետական պաշտոնյաների աշխատավարձերի բարձրացման օրինագծի առաջին ընթերցմամբ քննարկումը Ազգային ժողովում բավականին ակտիվ վերջաբան ունեցավ՝ խորհրդարանում ներկայացված քաղաքական ուժերի խմբակցությունների ներկայացուցիչների ելույթներով: Թեպետ կառավարությունը պնդում է, որ օրինագիծը միտված է ոլորտի կարգավորմանը, այնուամենայնիվ «Ժառանգություն» կուսակցության խմբակցության նորընտիր ղեկավար Զարուհի Փոստանջյանը արդարացված չի համարում եկող տարի սպասվելիք բարձրաստիճան պետական պաշտոնյաների, այդ թվում և պատգամավորների աշխատավարձերի կտրուկ աճը։ «Դեռևս ստանալով 240 հազար դրամ աշխատավարձ պատգամավարը խոստովանեց, որ լավ  չի աշխատում»։ Ներկա պայմաններում նման օրինագծի ընդունումը պատգամավորը անբարոյական համարեց և հայտարարեց, որ առկա տեսքով «Ժառանգությունը» օրինագծին դեմ է քվեարկելու։

ՀԱԿ խմբակցության քարտուղար Արամ Մանուկյանը նշեց, որ օրինագծի ընդունումը կարող է հանգեցնել նոր գնաճի: Ըստ նրա՝ փաստաթղթի տնտեսական արդյունավետությունը հաշվարկված չէ, իսկ ներկա պատկերը բավականին մտահոգիչ է։

«Օրինաց երկիր» խմբակցության անդամ Խաչիկ Հարությունյանը ողջունեց կառավարության նախաձեռնությունը՝ աշխատավարձերի ոլորտի կարգավորմանը միտված օրինագծի տեսքով: Միևնույն ժամանակ՝ պատգամավորը հույս հայտնեց, որ գումարների ավելացման հերթը կհասնի և պետական հաստատություններում  ցածր աշխատավարձ ստացող աշխատակիցներին։

«Բարգավաճ Հայաստան» խմբակցության քարտուղար Նաիրա Զոհրաբյանը նշեց, որ օրինագիծը ունի քաղաքական ենթատեքստ՝ հաշվի առնելով, որ նախարարները երկու գործակցով ավելի բարձր աշխատավարձ կստանան, քան՝ պատգամավորները: Օրինագիծը դեռ լրջագույն քննարկումներ կանցնի, բայց, այնուամենմայնիվ, Զոհրաբյանին չի գոհացնում համագործակցությունը օրենսդրի և գործադրի միջև։

ՀՀԿ խմբակցության ղեկավար Գալուստ Սահակյանը իր հերթին քննադատեց օրինագծի ընդդիմախոսներին՝ պոպուլիզմի համար՝ կոչ անելով գործընկերներին բարձրացվելիք աշխատավարձի մի մասը տրամադրել կարիքավորներին: Ըստ նրա՝ պետք չէ  այս լուրջ օրինագիծը անձնավորել։

Ըստ ավանդույթի՝ քառօրյայի վերջին օրը քննարկված հարցերի քվեարկությունը կանցկացվի հաջորդ քառօրյային:

Ցուցադրել ավելի
Back to top button