Մշակույթ

Հանրությանը ներկայացվեց Լեւոն Անանյանի «Ժամանակ և ոգի» ժողովածուն

Ալիսա Գեւորգյան
«Ռադիոլուր»

 Հայաստանի գրողների միությունում կայացած  հուշ-ցերեկույթի ընթացքում այսօր մեկ անգամ ևս արժեւորել են  ՀՀ մշակույթի վաստակավոր գործիչ, սեպտեմբերի 2-ին կյանքից հեռացած անվանի գրող Լևոն Անանյանի  ստեղծագործական ժառանգությունը: Միջոցառմանը ընթերցողի դատին է հանձնվել  Բեյրութում լույս տեսած Լևոն Անանյնանի «Ժամանակ և ոգի» հրապարակախոսական ժողովածուն:
Գրողի մահվանից մոտ մեկ ամիս անց  հրատարակված  հատորն ամփոփում է  Լևոն Անանյանի  Հայաստանի անկախացումից հետո տպագրած հրապարակախոսական, գեղարվեստական մի շարք ստեղծագործություններ, ելույթներ ու   հրապարակումներ։ Դասական ուղղագրությամբ  լույս տեսած «Ժամանակ և ոգի» հատորը ներկայացնում է հեղինակի գրական ժառանգության ընտրանին : Գիրքը լույս է  տեսել Լիբանանում՝ Մեծի Տանն Կիլիկիո  կաթողիկոսության տպարանում: Այն խմբագրել է Անթիլիասի հայագիտական  և կրթական գրասենյակի ղեկավար  Սարգիս Կիրակոսյանը:

«Լևոնին խոստացել էի, որ մինչև հոկտեմբերի 13-ը գիրքը պատրաստ կլինի  ու լավ նվեր կդառնա ծննդյան օրվա առիթով։ Գիրքն ահա բերել եմ, բայց Լևոնն, ավաղ չկա»,- «Ռադիոլուրի» հետ զրույցում այսօր ցավով նկատեց Սարգիս Կիրակոսյանը։ Դասական ուղղագրությամբ լույս տեսած գիրքը հասցեագրված է մասնավորապես սփյուռքահայ ընթերցողին: Սարգիս Կիրակոսյանի բնորոշմամբ՝ այն  վերանկախացված Հայաստանի 20-ամյա կյանքի արժեքավոր վկայագրություն է: Այստեղ հեղինակի ցավն է, տագնապները, միաժամանակ՝ անսահման լավատեսությունը ապագայի հանդեպ։

Ցուցադրել ավելի
Back to top button