Մշակույթ

Տասնմեկերորդ անգամ մեկնարկում է «Հայֆեստը»

Սոնա Հակոբյան
«Ռադիոլուր»

Մշակույթի նախարարության աջակցությամբ անցկացվող «ՀայՖեստ»  միջազգային թատերական փառատոնը կմեկնարկի հոկտեմբերի 1- ին։ 11-րդ «ՀայՖեստը» հանդիսատեսին կներկայանա նոր ոճով և նոր տարբերանշանով։ Այս միջազգային թատերական փառատոնն առաջին անգամ կայացել է 2003-ին։
«Բարձրագույն քիմիա». այս տարբերանշանով այս տարի կանցկացվի «ՀայՖեստը»։ Սեր, գաղափար, գործողություն, խիզախություն ու  երազանք. առանց այս տարրերի անհնար է պատկերացնել փառատոնը, ասում է դրա նախագահը՝ Արթուր Ղուկասյանը։ «Մենք ամեն օր կունենանք և’ հայկական, և’ արտասահմանյան ներկայացումներ: «ՀայՖեստը» կրկին լեփ լեցուն է ժանրերով` և դրամատիկական, և’ բացօթյա, և’ պարային, և’ մուլտիմեդիա, և’ տիկնիկներ»:

Փառատոնին կմասնակցեն 18 երկրի 25 թատերախումբ` ՄԵծ Բրիտանիայից, Արգենտինայից, Իտալիայից, Լատվիայից, Լիտվայից, Իրանից, Ռուսաստանից և այլն: Այս տարվա նշանավոր ներկայացումներից է Լիտվայի Օսկարա Կարշունովասի թատրոնի «Միրանդա» ներկայացումը` ըստ Շեքսպիրի «Փոթորիկը» պիեսի։

Փառատոնի նախագահ Արթուր Ղուկասյանի խոսքով`  վերջապես Լիտվայի  մշակույթի  նախարարության աջակցությամբ հայ հանդիսատեսը հոկտեմբերի 10- ին ռուսական թատրոնում հնարավորություն կունենա  դիտելու նշված ներկայացումը: Փառատոնին կմասնակցեն թատրոններ նաև Երևանից և Հայաստանի մարզերից:

Փառատոնի բացումը կազդարարի ՄԵծ Բրիտանիայի «1927» թատրոնը «Կենդանիները և երեխաները գրավել են փողոցները» մուլտիմեդիա ներկայացմամբ։ Ներկայացումը 2011 թվականին Էդինբուրգի միջազգային թատերական փառատոնի լավագույնների շարքում է եղել:

Back to top button