Հասարակություն

Մի քանի օրից dasaran.am- ին կմիանա Սյունիքի մարզը

Աիդա Ավետիսյան
«Ռադիոլուր»

Ամառային արձակուրդների ընթացքում dasaran.am կրթական ծրագիրը համալրվեց նոր` «Տեղափոխումներ» բաժնով, որի շնորհիվ հնարավորություն կստեղծվի առցանց միջավայրում, ընդամենը մի քանի կոճակ սեղմելով, իրականացնել կայքում գրանցված դպրոցների աշակերտների տեղափոխումներ այլ դասարաններ կամ դպրոցներ։

Տեղեկատվական այս նոր գործիքը հնարավորություն կտա նաև աշակերտի նախորդ ուսումնառության «Առաջընթաց», «Օրագիր» եւ «Մատյան» բաժինների տվյալները նոր դպրոցի տվյալների բազայում հասանելի դարձնել։ Այսինքն` աշակերտը մեկ այլ դպրոց կամ դասարան կտեղափոխվի նախորդ ուսումնառության ամբողջական նախապատմությամբ` իր անձնական էջով և նախկին տվյալներով, ինչը հնարավորություն կտա ուսուցիչներին և տնօրենին ձևավորել նոր աշակերտի առաջադիմության պատկերը։

Հավատարիմ մնալով իրենց գաղափարախոսությանը` նոր տեղեկատվական տեխնոլոգիաների ներդրման միջոցով  զարգացնել Հայաստանում կրթական ոլորտը, կայքը պատրաստվում է նորամուծությունների։ «Շուտով պատրաստվում ենք հայերեն լեզվի  ուղղագրություն,  հոմանիշ-հականիշ սովորրեցնող խաղեր ստեղծել, որպեսզի մեր աշակերտները ալտերնատիվ կրթական միջավայրում, այսինքն dasaran.am-ում, կարողանան  թե’ հայերեն լեզվի ուղղագրությունը սովորել, թե՝ հոմանիշ-հականիշը, որպեսզի ավելացնեն  իրենց բառապաշարը»,- ասում է կայքի հիմնադիր- նախագահ Սուրեն Ալոյանը։

Ծրագրի օգտատերերի «Ընտանիքին» ներկայումս անդամագրված է Հայաստանի Հանրապետության հանրակրթական դպրոցների գերակշիռ մեծամասնությունը` 1400 դպրոցներից 757-ը։ Մի քանի օրից ծրագրին կանդամակցի  նաև Սյունիքի մարզը։

Ցուցադրել ավելի
Back to top button