ԿարևորՀասարակություն

Ճարտարագիտականն արդեն ունի միջազգային մակարդակի լաբորատորիաներ

Աիդա Ավետիսյան

«Ռադիոլուր»
Այսօր ՀՀ նախագահ Սերժ Սարգսյանը ներկա է գտնվել Հայաստանի պետական ճարտարագիտական համալսարանի հայկական ազգային ճարտարագիտական լաբորատորիաների բացման արարողությանը։ 2011 թվականի նոյեմբերին ՀՀ նախագահ Սերժ Սարգսյանի և «Նեյշնլ ինսթրումենթս» ընկերության նախագահ, համահիմնադիր և գլխավոր տնօրեն Ջեյմս Թրուշարդի հանդիպման ժամանակ հայտարարվեց հայկական ազգային ճարտարագիտական լաբորատորիաների ստեղծման անհրաժեշտության մասին, իսկ արդեն 2012 թվականի մայիսին այդ լաբորատորիաները հիմնադրելու վերաբերյալ ստորագրվեց փոխըմբռնման հուշագիր:

Լաբորատորիաներ ստեղծելու ծրագիրը միտված է տեխնոլոգիաների և նորարարության միջոցով ուժեղացնել Հայաստանի ճարտարագիտության ոլորտի կրթական կարողությունները և հետազոտական ներուժը` միջազգային չափանիշներին համապատասխանեցնելով ՀՊՃՀ կրթական և հետազոտական կառույցները:  Շրջայցի ժամանակ նախագահին ներկայացվեցին  լաբորատորիաները, որոնք կսպասարկեն ՀՊՃՀ վեց ֆակուլտետների 24 մասնագիտություններով սովորող շուրջ 2000 ուսանողի։ Նրանց կտրամադրվի տեխնիկական դասընթացների ու հետազոտական աշխատանքի համակցման հնարավորություն:

Կրթության և գիտության նախարար Արմեն Աշոտյանը կարևորեց այսօրինակ լաբորատորիաների առկայությունը մեր հանրապետությունում։ Մոտ 6 մլն ԱՄՆ դոլար արժողությամբ ծրագրի  շրջանակներում ստեղծվելու է  ժամանակակից գիտակրթական և գիտահետազոտական բազա` պետություն- մասնավոր հատված, միջազգային կազմակերպություններ համագործակցության  եռանկյան շղթայում: Լաբորատորիաները ուսանողներին կտրամադրի տեխնիկական դասընթացների ու հետազոտական աշխատանքի համակցման հնարավորություն` նրանց մասնագիտական ճարտարագիտական աշխատանքի նախապատրաստելու նպատակով: «Սա կնպաստի, որ մեզ մոտ սովորող  ինժեներները տիրապետեն ժամանակակից տեխնիկային և այդ պատրաստվածությամբ մտնեն տնտեսություն,  որտեղ արդեն ներդրվում են ժամանակակից  տարբեր տեխնոլոգիաներ` սկսած ավտոմատ հոսքագծերից,  առանձին սարքավորումներից,  ռոբոտներից, որոնց գերակշիռ մեծամասնության և’ կառավարումը , և’ չափագրումն ու հաշվառումը էլեկտրոնիկայով է»,- ասում է նախարարը։

Հայաստանի պետական ճարտարագիտական համալսարանի ռեկտոր Արա Ավետիսյանի խոսքով` սրանք են այն կարևոր բաղադրիչները, որոնց հիման վրա էլ գիտատար տնտեսությունը պետք է  սպասարկվի ժամանակակից, որակյալ ճարտարագիտական կրթությամբ և հետազոտություններով: Ռեկտորը վստահեցնում է, որ այսուհետ համալսարանը կդառնա նոր իմացությամբ և նոր տեխնոլոգիաների կիրառմամբ  ինժեներական մտքի դարբնոց:

Ըստ նախարար Արմեն Աշոտյանի`  պետության ուշադրությունը և ներդրումները  բուհական համակարգի արդիականացման մեջ այսքանով չի սահմանափակվում: Կրթության և գիտության նախարարության կողմից մրցակցային հիմնադրամի շրջանականերում նախատեսված է ամբողջովին արդիականացնել համալսարանի տեղեկատվական ցանցային ողջ տնտեսությունը, որի համար տրամադրվել է 600 հազար ԱՄՆ դոլարին համարժեք գումար։

Հայաստանում նման մեծ ներդրումը պայմանավորված է, ըստ ԱՄՆ դեսպան Ջոն Հեֆֆերնի, գիտելիքահենք տնտեսության առկայությամբ։

 

Back to top button