Արաքսում կարկուտից հետո գյուղացին փորձում է հողից բերք ստանալ

Սաթիկ Իսահակյան

«Ռադիոլուր- Արմավիր
http://www.armradio.am/hy/wp-content/uploads/2013/09/030913araks.mp3
Մայիսի 12-ի ուժեղ կարկուտը  մեծ վնաս հասցրեց Արմավիրի տարածքի Արաքս համայնքի  գյուղատնտեսությանը: Համայնքում հողերը բերրի են, այգիներն էլ պտղատու, սակայն այս տարի գյուղացիների չարչարանքը մնաց անօգուտ: Այժմ դեղձի ու սալորի այգիներում որոշակիորեն նշմարվում է ծառապտուղը, բայց ամբողջությամբ վնասված:  Այգեգործները   հույս կապում   են նաև վնասված բերքի հետ:

Թովմաս պապիկի գործն այժմ պահակություն անելն է։ Հասնելու դեպքում իրենք մտադիր են բերքը հանձնել Վանանդի վերամշակող գործարանին: Բայց դեղձը դեռ չհասած թափվում է ծառից, քանի որ ամբոջությամբ ծակծկված է ու որդնած:

Համայնքի պտղի այգիների մեծ մասում բերք չկա:  Սարգիս Վարդանյանը  վաղ գարնանից իր սեփականաշնորհված հողերում է, ափսոսում է  բերքատու այգիների ու բերրի հողերի համար, որոնց ուժը կոտրվեց գարնանային աղետից: Այգիների  և վարելահողի մշակության համար մեծ ծախսեր է  արել՝ շուրջ 1 մլն 600 հազար դրամ: Եթե անցած տարի Սարգիսը սալորի մեկ ծառից ստացել էր  մինչև 150 կգ բերք, ապա հիմա  ծառի բերքը չի հասնում  նույնիսկ  50կգ -ի, որը հանձնելու է վերամշակող ձեռնարկությանը  1կգ`50 դրամով:  Ամեն կերպ փորձում է մեղմացնել կրած վնասները: Տրամադրված օգնություններն իր հաշվարկով առավելագույնը  300 հազար դրամ է: Նրա խոսքերով՝  այդ գումարը իր մշակած խաղողի 1/4  մասը չի  կազմում:

Սարգիսը մշակում է նաև բանջարեղեն, որտեղ 2-րդ անգամ է ցանքս կատարել: Սերմերը սեփական միջոցներով հարևան մարզից է ձեռք բերել և այժմ սպասում է բերքի հասունացանը:  Ընդհանուր վեգետացիոն շրջանից ետ ընկած  բույսը  չի հասցնի  ապահովել ամբողջ բերքը, քանի որ 15-20 օրից եղանակները փոխվում են, որի հետ ավարտվում է նաև գյուղատնտեսական տարին:

Կարկտահարված հողերում շատ են մրջյունները,  պայքարի միջոցներն ապարդյուն են անցել: Հայկ Հովհաննիսյանը  իր  վնասված սեփականաշնորհված հողում  աշնանացան վարունգ է դրել, որի աճը շատ թույլ է: Հայկը մտահոգված է, որ  ներդրումները դարձյալ  անօգուտ են լինելու։  Կարկտահարությունից հետո գյուղացիներից շատերը մեկնել են արտագնա աշխատանքի, մի մասն էլ հողագործությունը ժամանակավորապես  փոխարինել է  անասնապահությամբ, որպեազի կարողանան տարին դուրս բերել: