ԿարևորՀասարակություն

Հանրապետության որոշ շրջաններում օգոստոսին կարկուտ կդիտվի

Աիդա Ավետիսյան
«Ռադիոլուր»

Օգոստոսին հարապետության որոշ հատվածներում, ըստ ԱԻՆ հիդրոմետ ծառայության օդերևութաբանական կանխատեսումների փոխտնօրեն Գագիկ Սուրենյանի, կդիտվի կարկուտ, սակայն ոչ այն քանակությամբ, որը եղավ գարնանային ամսիներին: Օդերևութաբանի կանխատեսումներով` այս ամառը կշարունակի մնալ նորմայի սահմաններում:

Ամփոփելով հուլիս ամիսը` ԱԻՆ «Հիդրոմետ» ծառայության օդերևութաբանական կանխատեսումների բաժնի պետ Գագիկ Սուրենյանը տեղեկացրեց, որ հանրապետության հյուսիսային շրջաններում տեղումների քանակը եղել է նորմայի սահմաններից ավելի, իսկ կենտրոնական և հարավային շրջաններում նորմայի սահմաններում: Հուլիսին մայրաքաղաքում օդի ջերմաստիճանը բարձրացել է մինչև 38 աստիճան, իսկ օգոստոսին, կանխատեսումների համաձայն, հանրապետության ողջ տարածքում օդի ամսական միջին ջերմաստիճանը կլնի նորմայից մեկ աստիճանով ցածր, տեղումների քանակը կենտրոնական և հարավային շրջաններում` նորմայի սահմաններում, հյուսիսիային շրջաններում՝ նորմային մոտ դրական շեղումով. «Մայրաքաղաքում օգոստոսին հնարավոր է ջերմաստիճանի բարձրացում մինչև 36-37 աստիճան, իսկ գիշերը` ջերմաստիճանի նվազում մինչև 12-13 աստիճան»:

Օգոստոսին 4-ից 5 օր երեկոյան ժամերին կլինեն կարճատև ամպրոպային բնույթի անձրևներ: Առաջիկա օրերին մինչև օգոստոսի երկուսը կդիտվի առանց տեղումների եղանակ, իսկ 2-ին 3-ին հյուսիսային շրջաններում օրվա երկրորդ կեսին կնկատվեն կարճատև ամպրոպային բնույթի տեղումներ: Ըստ օդերևութաբանի` առաջիկա օրերին շրջաններից մեծ մասում կեսօրից հետո կդիտվեն կարճատև անձրևներ և ամպրոպ:

Ըստ Գագիկ Սուրենյանի` նման ամառներ մենք շատ ենք ունեցել և որևէ վտանգավոր շեղումներ չկան և ավելացնում է, որ վտանգավոր են այն ամառները, երբ օդի ջերմաստիճանը նորմայից բարձր կամ ցածր է 5 աստիճանով: Սուրենյանի խոսքով` ՀՀ –ում մի փոքր ավելացել է վտանգավոր երևույթների թիվը . այս տարի գարնանային ամիսներին գրանցվեցին կարկտահարության շատ մեծ դեպքեր: Օգոստոսին կարկուտ կդիտվի առանձին հատվածներում` հիմնականում Շիրակում, Լոռիում և Տավուշում, և միաժամանակ հանգստացնում, որ ոչ այն քանակությամբ, ինչը դիտվեց մայիս- հունիս ամիսներին:

Ցուցադրել ավելի
Back to top button