ԿարևորՔաղաքական

Դատախազը պահանջում է Վարդան Սեդրակյանին դատապարտել 12 տարի ազատազրկման

ՀՀ  նախագահի  նախկին թեկնածու,ԱԻՄ նախագահ Պարույր Հայրիկյանի սպանության փորձի գործով  ամբաստանյալներին առաջադրված մեղադրանքը ճիշտ է որակված, նրանք մեղավոր են  հանցանքը կատարելու մեջ: Այս մասին իր մեղադրական ճառում այսօր նշել է գործով դատավարական հսկողություն իրականացնող դատախազ, մեղադրող Արամ Ամիրզադյանը:

«Փաստինֆո»-ի փոխանցմամբ, մեղադրողը միջնորդել է ՀՀ նախագահի նախկին թեկնածու Վարդան Սեդրակյանին մեղավոր ճանաչել ՀՀ քրեական  օրենսգրքի 38-34-305-րդ  հոդվածով՝պետական, քաղաքական կամ հասարակական գործչի սպանության փորձի կազմակերպում և դատապարտել  12 տարվա ազատազրկման: Մեղադրողը միջնորդել է ամբաստանյալ Սամվել Հարությունյանին մեղավոր ճանաչել ՀՀ քրեական  օրենսգրքի 34-305-րդ հոդվածով՝ սպանության փորձ, իսկ Խաչատուր Պողոսյանին՝ 34-305-րդ հոդվածից բացի նաև 235-րդ հոդվածով՝ ապօրինի զենք (այդ զենքով երկու կրակոցներ են արձակվել Պ.Հայրիկյանի վրա) և դատապարտել համապատասխանաբար  13  և 14  տարվա ազատազրկման:

Մեղադրողը դատարանի ուշադրությունն է հրավիրել այն հանգամանքի վրա, որ Խ.Պողոսյանի դեպքում առկա է հանցագործության ռեցիդիվ՝  նա դատապարտվել է ծանր հանցագործության մեղադրանքով՝ ՀՀ քրեական օրենսգրքի 266-րդ հոդվածով՝ Թմրամիջոցների, հոգեմետ (հոգեներգործուն) նյութերի և դրանց պրեկուրսորների ապօրինի շրջանառությունն իրացնելու կամ պատրաստելու նպատակով կամ դրանց ապօրինի իրացնելը, որը չի մարել, բացի այդ նա համաներմամբ ազատվել է  ՀՀ քրեական օրենսգրքի 334-րդ հոդվածով՝  հանցագործությունը պարտակելը,  պատիժը կրելուց: Ա.Ամիրզադյանը նշել է, որ  երեք ամբաստանյալներն էլ ունեն անչափահաս երեխաներ:

Մեղադրող Արամ Ամիրզադյանի ճառին հաջորդել է տուժող Պարույր Հայրիկյանի ներկայացուցիչ Լևոն Բաղդասարյանի ճառը:

ՀՀ նախագահի նախկին թեկնածու Պարույր Հայրիկյանի սպանության փորձը քաղաքական հանցագործություն է, նրա կրծքին արձակված  կրակոցն ունեցել է սպանելու և ոչ թե վախեցնելու դիտավորություն: Այս մասին այսօր իր ճառում նշել է  տուժող Պարույր Հայրիկյանի ներկայացուցիչը:

Այդուհանդերձ, եթե դատարանն ապացույցները գնահատելիս գտնի, որ  մեղքն  ապացուցված չէ կամ  կան  ակնհայտ հակասություններ, որոնք կարող են անդրադառնալ  դատական ակտի վրա,  թող դատարանն այն գնահատի ի նպաստ ամբաստանյալների:  Ըստ Լ.Բաղդասարյանի, սակայն  եթե ակնհայտ լինի, որ  ամբաստանյալներն են հանցագործություն կատարողներն ու կազմակերպիչը,  «պետք է գործի օրենքն իր ողջ խստությամբ», այդ թվում՝  բավարարվի քաղաքացիական հայցը: «Հայաստանի քաղաքացին պետք է վստահ լինի, որ պետությունը պաշտպանում է իրեն հանցավոր ոտնձգություններից, իսկ ընտրություններից առաջ և հետո մահափորձերն ու վախի մթնոլորտ ստեղծողներն այսուհետ մեր հայրենիքում նմանօրինակ «գործերով»  պետք է  դառնան գործազուրկ»,- ասաց տուժողի ներկայացուցիչը:

Լ.Բաղդասարյանն ընդգծել է, որ  տուժող կողմի ներկայացրած  հատուցման գումարի՝ 43մլն.  424 հազար դրամ, պահանջը, ավելի քան քիչ է՝ հաշվի առնելով, որ տուժող Հայրիկյանի աջ ձեռքը հաշմվել է և որ երկրորդ վիրահատությունից հետո ոչ մի մասնագետ չի երաշխավորել, որ այն լրիվ ծավալով կվերականգնվի:  Ավելին, ըստ տուժողի ներկայացուցչի, գործում առկա է Բրյուսելի Ձեռքի և վերին անդամի վիրաբուժության բաժանմունքի բժիշկ Անն Լեժանի մասնագիտական գրությունն, ըստ որի  հետվիրահատական բուժումները կլինեն երկար և 2 տարի անց պարտադիր անհրաժեշտ է  լինելու նոր վիրահատություն:

Ցուցադրել ավելի
Back to top button