ԿարևորՔաղաքական

Պռոշյանի գյուղապետարանի աշխատակիցները որպես բողոք ազատվեցին աշխատանքից

Լուսինե Վասիլյան

«Ռադիոլուր»

Պռոշյան համայնքի գյուղապետարանի 15 հոգանոց  աշխատակազմի 13 աշխատակից  այսօր աշխատանքից ազատվելու դիմում է ներկայացրել  համայնքի ղեկավար Արթուր Մուրադյանին: «Մեր քայլը մենք պատճառաբանում ենք նրանով , որ չունենք վստահության մթնոլորտ, գյուղապետի սպանության գործը բացահայտված չէ»,- ասում են նրանք։

Խոսքը Պռոշյանի նախկին գյուղապետ Հրաչ Մուրադյանի սպանության և մինչ այժմ դրա չբացահայտման մասին է: Աշխատակազմի քարտուղար Լուսինե Պետոյանը, ով լրագրողներին ներկայացում էր աշխատանքից հրաժարվողների՝ այս քայլին գնալու դրդապատճառները, շեշտեց, որ իրենք նախկին գյուղապետի  սպանությունը քաղաքական են համարում: 
«Մենք Հրաչ Մուրադյանի սպանությոան մեջ քաղաքական ենթատեքստ են տեսնում, բոլորս համոզված ենք, որ նրանք սպանել են, քանի որ գյուղապետ էր։ Այսինքն՝ մտածում ենք , որ մարդիկ կային, ովքեր ձգտում էին այդ աթոռին»։

Ըստ հրաժարական ներկայացրած աշխատակազմի քարտուղարի՝ իրենց անվստահությունը տարածվում է նաև նորընտիր գյուղապետի  վրա: Իսկ հարցին, թե չկա՞ր բողոքն արտահայտելու այլ ձև, քան աշխատանքից հրաժարվելը, ազատվողների Մաթևոս Մուրադյանն արձագանքեց. 
«Ինչ է, սա ակցիա՞ չէ, բողո՞ք չէ, սա էլ բողոքի մեր ձևն է»: Իսկ ահա հարցին , թե արդյոք մտավախություն կար, որ նորընտիր գյուղապետն ինքն է աշխատանքից ազատելու նախորդ գյուղապետի թիմին, Մաթևոս Մուրադյանն այսպես արձագանքեց. «Մտավախության  հարց չկա, վաղ թե ուշ բոլորին էր ազատելու էր»:

 

Որևէ  մեկին չէի  պատրաստվում հեռացնել աշխատանքից. սա արդեն Պռոշյանի նոր գյուղապետի վստահեցումն է: Աշխատակիցների զանգվածային հրաժարականի, գյուղապետարանում ստեղծված  արտակարգ իրավիճակի մեկնաբանությունների հարցում  Արթուր Մուրադյանը շռայլ չէր: Պռոշյանի գյուղապետն  ասաց, թե  ինքն  էլեկտրոնային կայքերի միջոցով է տեղեկացել աշխատակազմի այս քայլի մասին, քայլը մեկնաբանել հրաժարվեց, բայց վստահեցրեց, որ հեռացողներին փոխարինողներ կգտնվեն:

 

«Իրենց հարցրեք, թե ինչու են ազատվում: Ես ասում եմ՝ ցանկություն ունեն, թող աշխատեն։ Ես չեմ պատրաստվում իրենց հեռացնել, իսկ եթե ցանկություն չունեն, գյուղում բազմաթիվ կրթված երիտասարդներ կան, իրենք կաշխատեն»,- ասում է գյուղապետը՝ ավելացնելով, որ պատրաստվում է աշխատել թերևս արդեն իր թիմով և «գործով արդարացնել պռոշյանցիների վստահությունը, որ ստացել է ընտրությունների ժամանակ»: Իսկ աշխատակազմի հետ հարաբերությունները հարթել ու լարվածությունը մեղմել  փորձել է: «Ես մտել եմ խնդրանքով, ցանկություն եմ արտահայտել, որ եկել եմ ձեզ հետ աշխատեմ։ Դրանից ավելին չէի կարող անել»:

Ի դեպ՝ գյուղապետի նոր թիմի անդամներից առնվազն երկուսն արդեն հայտնի են: Նրանցից մեկը Արմենուհի  Մելիքյանն է, ով, հիշեցնենք, Հրաչ Մուրադյանի սպանությունից հետո նշանակվել էր գյուղապետի ժամանակավոր պաշտոնակատար: Նշանակումը, սակայն, պռոշյանցիների կողմից միանշանակ չէր ընդունվել և նա հրաժարվել էր պարտականությունների կատարումից: Այսօր Արմենուհի Մելիքյանը գյուղապետի աշխատասենյակում էր: Մեզ հետ զրույցում ասաց, որ աջակցում է  Արթուր Մուրադյանին, պատրաստվում է աշխատել նրա հետ, իսկ գյուղում տեղի ունեցողը քաղաքական շահարկում է համարում:

Եթե աշխատանքից ազատվողները դժգոհում էին ներկա գյուղապետից, գործող գյուղապետը դժգոհում էր նախկին թիմից, ապա  գյուղապետի աշխատասենյակի մոտ  պռոշյանցի մի մեծահասակ  կին էլ դժգոհում էր Պռոշյանում ստեղծված իրավիճակից. գյուղը միշտ հաշտ է եղել, հիմա երկու թշնամական ճամբարի է բաժանվել, ասում էր։

 

Հիշեցնենք, որ ապրիլի 2- ին Պռոշյանի գյուղապետարանի մոտ սպանվել էր գյուղապետ Հրաչ Մուրադյանը: Հուլիսի 14-ին Պռոշյան գյուղում անցկացվեցին գյուղապետի արտահերթ ընտրություններ. համայնքի ղեկավարի պաշտոնի համար պայքարում էին հանրապետական Արթուր Մուրադյանը, դաշնակցական, բայց  ինքնառաջադրված Վովա Սահակյանը, ով ձայների փոքր տարբերությամբ պարտվեց հանրապետական թեկնածուին։

Ցուցադրել ավելի
Back to top button