ԿարևորՀասարակություն

Ինչու է լռում իշխանությունը, երբ բողոքում է հասարակությունը. քննարկում՝ ՄԱԱ-ում

Լուսինե Վասիլյան

«Ռադիոլուր»

Տրանսպորտի ուղեվարձի բարձրացման հարցի շուրջ  այսօր հասարակական–քաղաքական քննարկում է հրավիրել Մամուլի ազգային ակումբը:  Երևանի քաղաքապետարանն ու մի քանի կուսակացություններ քննարկման հրավերին չեն արձագանքել:  «Նոր ժամանակներ» կուսակցության նախագահ Արամ Կարապետյանը քննարկմանը նշել է, որ հասարակական բողոքին ի պատասխան իշխանություններն առայժմ լուռ են: Նրա կարծիքով՝  տրանսպորտի գնի բարձրացումը նախ և առաջ պետք է քննարկվեր Երևանի ավագանու արտահերթ նիստում:

ԵՊՀ կիրառական սոցիոլոգիայի ամբիոնի վարիչ Արթուր Աթանեսյանն  ուղեվարձի բարձրացումը պրմիտիվ խնդիր է համարում՝  հիշեցնելով, որ  տևական ժամանակ Հայաստանում հասարակական տրանսպորտի  գինը չի փոխվել: Ըստ նրա՝ տարօրինակ է, որ  գազի գնի բարձրացումից հանրությունն առանձնապես չբողողոքեց, մինչդեռ բողոքում է հասարակական տրանսպորտի  ուղեվարձի բարձրացումից: Աթանեսյանի կարծիքով ՝ սա նշանակում է պայքարել ոչ թե պատճառների, այլ հետևանքների դեմ: Տրանսպորտի գնի փոփոխությունն, ըստ նրա, փոքրիկ հետևանքներից մեկն է, իսկ պատճառները պրոռուսական   քաղաքականության մեջ են:

«Վերջին տարիներին Հայաստանն իր անկախության ու անվտանգության բանալիները հերթով հանձնել է Ռուսաստանին, իսկ հիմա զարմանում ենք, թե ինչու է Ռուսաստնաը  հերթով օգտագործում այդ բանալիներն այնպես,  ինչպես ուզում է»:

«Նոր ժամանակներ»  կուսակցության նախագահ Արամ Կարապետյանն  այս  հարցում պրոռուսական քաղաքականության հետևանքենրը տեսնելու մոտեցումը չի կիսում: Նա կարծում է, որ հասարակական բողոքի միակ հասցեատերը իշխանություններն են:  Ըստ նրա ՝  կա հասարակական բողոք, կան հարցեր, բայց  առայժմ չկան պատասխաններ իշխանությունների կողմից:

«Մենք ունենք երիտասարդների մի խրոխտ զանգված, որը պայքարում է, բայց պայքարի վերջնական հանգրվանը չի երևում : Ինչ է կատարվում իշխանության ներսում, բոլորը լուռ են, ամեն ինչ գցվել է գծատերերի վրա: Ստացվում է, որ այս ակցիաներով անագամ պատասխան ստանալ չենք կարողանում»:

Իշխանություններն, ըստ Արամ Կարապետյանի, իրավիճակի հանգուցալուծման  երկու ճանապարհ ունեն, կամ սուբսիդավորում, կամ եկամուտների բարձրացում: Կառավարությունը, ընդդիմադիր գործչի կարծիքով, պետք է նաև մանրամասն հաշվետվություն ներկայացնի այն մասին, թե որն է թանկացումների դեմ պայքարի տրամաբանությունն ու հայեցակարգը: Իսկ առաջին քայլը  պետք է լիներ Երևանի ավագանու արտահերթ նիստը:

«Դա կլիներ առաջին քաղաքական քննարկումը, որի ընթացքում բացատրություններ ու հիմնավորումներ կհնչեին»:

Երևանի ավագանու արտահերթ նիստ հրավիրելու փորձ արել է «Բարև Երևան» դաշինքը, ինչր չի հաջողվել անհրաժեշտ ձայներ չունենալու պատճառով:

«Բարև Երևան» խմբակցության անդամ Արթուր Գասպարյանն, ով մասնակցում էր այսօրվա քննարկմանը,  ավագանու շրջանակում իրենց նախաձեռնություններին չանդրադարձավ, փոխարենը պատմեց  «Վճարում ենք 100 դրամ» նախաձեռնությանը միանալու իր փորձի մասին: Ավագանու անդամը երեկ կանգառից իր ուղղությամբ գնացող  5 ուղևորների որոշել է անվճար  տեղափոխել:

«Անցնելով երկու հարյուր մետր, պետավտոտեսուչը կանգնեցրեց ինձ, ասաց՝ շատ ուղևոր եք վերցրել, հետևում երեք հոգուց ավելի իրավունք չունի նստի: Ես էլ ասացի` արձանագրեք նաև երթուղային տաքսիների խախտումները, որոնք գերբեռնված, կիսակքած վիճակում մարդկանց են տեղափոխում խտացումները»:

Պետավտոտեսուչը արձանագրություն չի կազմել:

Ցուցադրել ավելի
Back to top button