Թուրքիայի և Ադրբեջանի միջև բարեկամական և եղբայրական հարաբերությունների զարգացուման անհրաժեշտությունն է հերթական անգամ ընդգծվել Ադրբեջանի նախագահ Իլհամ Ալիևի եւ Թուրքիայի արտաքին գործերի նախարար Ահմեդ Դավութօղլուի այսօրվա հանդիպման ընթացքում։ Դավութօղլուն Բաքում է ժամանել պաշտոնական այցով։
Թուրքիայի արտգործնախարարն ադրբեջանցի իր պաշտոնակից Էլմար Մամեդյարովի հետ համատեղ ասուլիում հայտարարել է, որ Անկարան միշտ սատարել է ու կսատարի Ադրբեջանին եւ պատրաստ է նպաստելու ԼՂ հակամարտության խաղաղ կարգավորմանը, հաղորդում է «Թրենդը»
Այս հայտարարությանն արձագանքել է ՀՀ Ազգային ժողովի փոխնախագահ Էդուարդ Շարմազանովը։ «Թուրքիայի արտգործնախարարն այսօրվա հայտարարությամբ վերահաստատեց, որ իր պետությունը հանդես է գալիս ղարաբաղա-ադրբեջանական հիմնախնդրի ոչ թե արդարացի, այլ ադրբեջանամետ լուծման օգտին: Ուստի, եթե Թուրքիան իսկապես շահագրգռված է ղարաբաղա-ադրբեջանական հակամարտության շուտափույթ կարգավորմամբ, ապա պետք է կատարի մեկ պարզ քայլ` չխառնվի եւ չմիջամտի կարգավորման գործընթացին»,- փոխխոսնակի խոսքերն է մեջբերել «Արմենպրեսը»:
Թուրքիայի արտաքին քաղաքական գերատեսչության ղեկավարը նաեւ Բաքվում այսօր արձագանքել է Հայաստանի գլխավոր դատախազի այն հայտարարությանը, որ 1915 թվականի ցեղասպանության զոհ գնացածների ընտանիքները պետք է նյութական փոխհատուցում ստանան, հայկական եկեղեցուն պետք է վերադարձվեն եկեղեցապատական հողերը, իսկ Հայաստանին` կորցրած հողատարածքները։
«Անկարան մտադիր չէ Թուրքիայի տարածքից քար անգամ տրամադրել որևէ մեկի, ու այն անձիք ովքեր հողային 
պահանջի հայտ են ներկայացնում, կտուժեն իրենց իսկ որդեգրած պահանջատիրական կեցվածքից։ Ոչ ոք նույնիսկ մտքի ծայրով չպետք է նման բան անցկացնի, դա զառանցանք է: Կովկասում խաղաղության ապահովման համար ամեն երկիր պետք է իր չափ ու սահմանն իմանա, հակառակ դեպքում՝ կտուժեն իրենց հարևանների նկաատմամբ հավակնություններ ունեցողները է»,- Դավութօղլուի այս խոսքերն էլ մեջբերել է «Ռեգնումը»։
