Հասարակություն

Պռոշյանի գյուղապետի սպանության բացահայտումը պետք է լինի հասարակության եւ պետական մարմինների ուշադրության կենտրոնում, ասում է ՀՅԴ գործիչը

Աիդա Ավետիսյան

«Ռադիոլուր»

Այս տարվա ապրիլի 2-ին Պռոշյանի գյուղապետարանի առջև սպանվեց  դաշնակցական գյուղապետ Հրաչ Մուրադյանը: Այժմ ընթանում է գործի  նախաքննությունը, ստեղծվել է «Հրաչ Մուրադյան. արդարության պահանջ» հասարակական շարժումը։
Արցախյան ազատամարտի բոլոր ճակատներով անցած, «Մարտական խաչ» երկրորդ աստիճանի շքանշանով պարգևատրված ազատամարտիկ Հրաչ Մուրադյանը,  ԱԺ-ի ՀՅԴ պատգամավոր Աղվան Վարդանյանի բնորոշմամբ, իր գյուղի բնակչությանը նվիրված անձնավորություն էր:  Ըստ նրա` Մուրադյանի նման մարդու սպանության գործի բացահայտումը պետք է լինի ինչպես  հասարակության, այնպես էլ պետական մարմինների ուշադրության  կենտրոնում:
«
Մեր նպատակն է, որ բացահայտվեն  և օրենքի ամբողջ  խստությամբ պատժվեն սպանության իրական հեղինակները: Մեզ պետք չէ անմեղ և ոչ հիմնավոր պատճառներով մարդկանց դատապարտում»,- ասում է Աղվան Վարդանյանը։
Այս շրջանում բնակչությունն անվստահություն ունի պետական ինստիտուտների նկատմամբ և այս գործի բացահայտումով դաշնակցական պատգամավորի ցանկությունն է արդարադատության հանդեպ  վստահություն ներշնչելը:  Նախաքննությանը խոչընդոտող հանգամանքը, ըստ Վարդանյանի, քաղաքացիների` իրավապահ մարմինների հետ չառնչվելու խնդիրն է:
Աղվան Վարդանյանն ու Արմեն Ռուստամյանն այս գործի առնչությամբ հանդիպել են ոստիկանապետի հետ և վերջինս էլ վստահեցրել է, որ ամեն ինչ են անելու գործը բացահայտելու համար:
Հրաչ Մուրադյանի սպանության գործով տուժողի իրավահաջորդի ներկայացուցիչ Մելանյա Առուստամյանը նշեց, որ այս սպանությունը վերջաբանն էր  Հրաչ Մուրադյանի և նրա հարազատների հանդեպ կատարված դիտավորյալ հանցագործությունների:

Անդրադառնալով հուլիսի 14-ին  Պռոշյանում կայանալիք գյուղապետի ընտրություններին` Աղվան Վարդանյանը նշեց, որ դաշնակցական Վովա Սահակյանն ինքնաառաջադրվել է՝ գյուղում առկա լարվածությունը թուլացնելու նպատակով։ Ըստ դաշնակցական պատգամավորի՝ եթե ընտրությունները կեղծվեն, ապա լարվածությունը կմեծանա, նշեց Աղվան Վարդանյանը։

Ցուցադրել ավելի
Back to top button