Քաղաքական

Նոր մոտեցում՝ մարդու իրավունքների պաշտպանությանը (լրացված)

Արտակ Բարսեղյան

«Ռադիոլուր»

Այսօր կայացավ Մարդու  իրավունքների պաշտպանության ազգային ռազմավարության դրույթների և ռազմավարության գործողությունների ծրագրի իրականացման հարցերով միջգերատեսչական հանձնաժողովի անդրանիկ նիստը, որի աշխատանքներին բացի պետական գերատեսչությունների բարձրաստիճան պաշտոնյաներից մասնակցում էին նաև մեր երկրում հավատարմագրված օտարերկրյա  դեսպանատների և միջազգային կազմակերպությունների ղեկավարները, հասարակական կազմակերպությունների ներկայացուցիչները:

Այս նոր կառույցի հիմնական նպատակներն են մարդու իրավունքների   պաշտպանության արդյունավետ   պետական   մեխանիզմների հաստատումը   և   դրանց իրականացման համար նպաստավոր պայմանների ստեղծումը, մարդու իրավունքների հարցերով զբաղվող պետական կառույցների և քաղաքացիական հասարակության  օժանդակության ապահովումը և շահագրգիռ հաստատությունների աշխատանքների համակարգումը:
Մարդու  իրավունքների  պաշտպանության ազգային  ռազմավարության  համաձայն՝ գործողությունների ծրագրի  իրականացումը վերահսկելու նպատակով կազմված հանձնաժողովը պետք է կանոնավոր կերպով անցկացնի գործողությունների  մոնիտորինգ և  դրա  արդյունքները համեմատի Մարդու  իրավունքների պաշտպանի գրասենյակի կողմից անցկացրած  մոնիտորինգի 
արդունքների հետ, իր ելույթում նշեց Ազգային անվտանգության խորհրդի քարտուղար Արթուր Բաղդասարյանը։
Այս նպատակով անհրաժեշտ է կատարել օրենսդրական փոփոխությունների վիթխարի ծավալի աշխատանք: Հանձնաժողովին ևս սպասում է զգալի աշխատանք:

Մարդու իրավունքների պաշտպան Կարեն Անդրեասյանը խոստովանեց, որ հանձնաժողովի անդրանիկ նիստը երկար սպասված է և մեծ ակնկալիքներ է կապում նորաստեղծ մարմնի հետ։ Ըստ օմբուդսմենի՝ առանց հաստատված գործողությունների ծրագրի անհնար է ապահովել հանձնաժողովի աշխատանքի արդյունավետությունը:

Հանձնաժողովին արդյունավետ աշխատանքի մաղթանքով հանդես եկավ մեր երկրում ԵՄ պատվիրակության  ղեկավար,  դեսպան  Թրայան  Հրիստեան:

Մարդու իրավունքների ոլորտում առկա բազում խնդիրների լուծման համար առկա է երկրի իշխանությունների և հասարակության կամքը, լրագրողներին հայտարարեց Ազգային անվտանգության խորհրդի քարտուղար Արթուր Բաղդասարյանը։

Ցուցադրել ավելի
Back to top button